ന്യൂദല്ഹി: രാജ്യത്ത് ഇത്തവണ മികച്ച മണ്സൂണ് ലഭിച്ചതോടെ ഭക്ഷ്യധാന്യങ്ങളുടെ ഉല്പ്പാദനത്തില് വന്തോതില് വര്ദ്ധനവുണ്ടാകുമെന്ന് പ്രതീക്ഷ. 2016-17ല് 2.07 കോടി ടണ് ധാന്യങ്ങള് ഉല്പ്പാദിപ്പിക്കപ്പെടുമെന്ന് കേന്ദ്രസര്ക്കാര് കരുതുന്നു. 2013-14ലെ 2.65 കോടി ടണ്ണാണ് ഇതുവരെയുള്ള റിക്കോര്ഡ് ഉല്പ്പാദനം.
മഴ ലഭ്യത തീരെ കുറഞ്ഞ പ്രദേശങ്ങളില് പോലും ജൂലൈ, ആഗസ്ത് മാസങ്ങളില് നല്ല മഴ ലഭിച്ചിട്ടുണ്ട്. ഇത് രാജ്യത്തെ കര്ഷകര്ക്ക് വലിയ നേട്ടമാകും. രാജ്യത്തെ ജലസംഭരണികളിലെ വെള്ളത്തിന്റെ അളവും തൃപ്തികരമാണ്.
2014ലും 2015ലും തുടര്ച്ചയായ രണ്ടുവര്ഷം രാജ്യമെങ്ങും കനത്ത വരള്ച്ച നേരിട്ടിരുന്നു. ഈ രണ്ടുവര്ഷങ്ങളിലും 14 ശതമാനത്തിന്റെയും പന്ത്രണ്ട് ശതമാനത്തിന്റെയും കുറവാണ് മഴയിലുണ്ടായത്. ഇത്തവണ മഴ ലഭിച്ച വരള്ച്ചാ പ്രദേശങ്ങളില് നിന്നും മികച്ച ഉല്പ്പാദനമാണ് കേന്ദ്രം പ്രതീക്ഷിക്കുന്നത്.
രാജ്യത്ത് ഇറക്കുമതി ചെയ്യുന്ന പയര്വര്ഗ്ഗങ്ങളുടെ വിതരണവുമായി ബന്ധപ്പെട്ട കാര്യങ്ങള് കേന്ദ്ര ഭക്ഷ്യ പൊതുവിതരണ മന്ത്രി രാംവിലാസ് പസ്വാന്റെ അധ്യക്ഷതയില് ചേര്ത്ത യോഗത്തില് അവലോകനം ചെയ്തു. ഇറക്കുമതിക്കാര്, ബന്ധപ്പെട്ട മന്ത്രാലയങ്ങളിലെ മുതിര്ന്ന ഉദ്യോഗസ്ഥര്, നിര്വ്വഹണ ഏജന്സികളുടെ പ്രതിനിധികള് തുടങ്ങിയവര് യോഗത്തില് സംബന്ധിച്ചു.
എല്ലാ പയര്വര്ഗ്ഗങ്ങളുടെയും വിലയില് കഴിഞ്ഞ ഒരുമാസത്തിനിടെ ഇടിവുണ്ടായതായി പസ്വാന് പറഞ്ഞു.
ആഭ്യന്തര ഉല്പ്പാദനവും ഇറക്കുമതിയും കണക്കിലെടുത്താല് കഴിഞ്ഞ വര്ഷവും ഈ വര്ഷവും സപ്തംബര് അവസാന വാരത്തില് പയര്വര്ഗ്ഗങ്ങളുടെ ലഭ്യത ഒരുപോലെയാണ്.
പയര്വര്ഗ്ഗങ്ങളുടെ ഇറക്കുമതിയില് കൂടുതല് സുതാര്യത പുലര്ത്തണമെന്ന് കേന്ദ്ര ഭക്ഷ്യമന്ത്രി ഇറക്കുമതിക്കാരോട് ആവശ്യപ്പെട്ടു. പയര്വര്ഗ്ഗങ്ങളുടെ ലഭ്യത വര്ദ്ധിപ്പിക്കുന്നതിന് വിവിധ രാജ്യങ്ങളുമായി ദീര്ഘകാല കരാറുകളില് ഏര്പ്പെട്ടിട്ടുണ്ടെന്ന് പസ്വാന് അറിയിച്ചു.
