പൂച്ചാക്കല്: പളളിപ്പുറത്തെ മലബാര് സിമന്റ്സിന്റെ ഗ്രൈന്റിംഗ് യൂണിറ്റിന് നിന്നും മറ്റു ജില്ലകളിലെ ഏജന്സികള് വാങ്ങുന്ന സിമന്റ് ആലപ്പുഴ ജില്ലയില് മറിച്ചുവില്പ്പന നടത്തുന്നതിനെച്ചൊല്ലി തര്ക്കം. ദൂരം കൂടുന്നതനുസരിച്ച് വിലക്കിഴിവു നേടുന്ന വ്യാപാരികള് ഗ്രൈന്ഡിംഗ് യൂണിറ്റിനു സമീപത്തുതന്നെ സിമന്റ് നല്കുന്നു എന്നു കണ്ടെത്തിയതിനെ തുടര്ന്നാണ് വിവിധ ജില്ലകളിലെ വ്യാപാരികള് തമ്മില് തര്ക്കമുണ്ടായത്.
പ്രതിദിനം 600 ടണ്ണോളം സിമന്റ് വിറ്റിരുന്ന ഗ്രൈന്ഡിംഗ് യൂണിറ്റില് നിലവില് വില്പന പകുതിയോളമായി കുറഞ്ഞിട്ടുണ്ട്. ജില്ലയിലെ സിമന്റ് വ്യാപാരികള്ക്ക് സിമന്റു നല്കുന്നതും ഇതര ജില്ലകളിലെ വ്യാപാരികള്ക്ക് നല്കുന്നതും തമ്മില് ഒരുചാക്കില് 50 രൂപയോളമുള്ള വില വ്യത്യാസമുണ്ട്. ലോഡ് കൊണ്ടുപോകേണ്ട ദൂരം കണക്കാക്കിയാണ് ഈ വിലക്കിഴിവ്.
ഇത്തരത്തില് വിലക്കിഴിവു നേടിയ എറണാകുളത്തെ വ്യാപാരി കഴിഞ്ഞ ദിവസം എടുത്തലോഡ് ഫാക്ടറിയില് നിന്നും അഞ്ചു കിലോമീറ്റര് അപ്പുറമുള്ള മണപ്പുറത്ത് ഇറക്കിയിരുന്നു. ഇതു പിടികൂടിയ ചേര്ത്തല താലൂക്കിലെ വ്യാപാരികള് മലബാര് സിമന്റ്സ് അധികൃതരെ വിവരം അറിയിച്ചു. ഇതിന്റെ അടിസ്ഥാനത്തില് എറണാകുളത്തെ വ്യാപാരികള്ക്ക് സിമന്റ് വില്പന നല്കുന്നതിന്റെ അളവു കുറയ്ക്കുന്നതിനു ധാരണയായിരുന്നു.
ദൂരത്തെ അടിസ്ഥാനമാക്കി വിലക്കിഴിവ് നല്കുന്നതില് പ്രതിഷേധിച്ചു ജില്ലയിലെ ചില വ്യാപാരികളും പള്ളിപ്പുറം ഫാക്ടറിയില് നിന്നും സിമന്റ് വാങ്ങുന്നത് കുറച്ചു. അതേസമയം ഇതര ജില്ലകളിലെ വ്യാപാരികള്ക്ക് അര്ഹമായ വിലക്കിഴിവ് നല്കുന്നതില് തങ്ങള് എതിരല്ലെന്നു ജില്ലയിലെ വ്യാപാരികള് പറഞ്ഞു.
തങ്ങള്ക്കും ഏജന്സി സ്ഥലത്തിന്റെ ദൂരത്തിന് അര്ഹമായ വിലക്കിഴിവ് വേണമെന്നും വിലക്കിഴിവ് വാങ്ങുന്ന ഇതര ജില്ലകളിലെ വ്യാപാരികള് തങ്ങളുടെ പ്രദേശത്ത് സിമന്റ് വില്ക്കാതിരിക്കാന് നടപടി വേണമെന്നുമാണ് ജില്ലയിലെ വ്യാപാരികളുടെ ആവശ്യം. സിമന്റ് വാങ്ങുന്ന വ്യാപാരികളുടെ വാഹനങ്ങളില് ജിപിഎസ സംവിധാനം വേണമെന്ന നിര്ദേശം നേരത്തെ മലബാര് സിമന്റ്സ് മുന്നോട്ടു വച്ചിരുന്നു. ഇതു പൂര്ണമായും നടപ്പാക്കിയാല് ഇപ്പോഴത്തെ പ്രശ്നങ്ങള്ക്ക് പരിഹാരമാകുമെന്നും അവര് ചൂണ്ടിക്കാട്ടുന്നു.
