മലപ്പുറം : രാജ്യത്തെ എല്ലാ ലോക്സഭാ മണ്ഡലങ്ങളിലും ഓരോ പാസ്പോര്ട്ട് സേവാ കേന്ദ്രങ്ങള് എന്നത് പ്രധാനമന്ത്രി നരേന്ദ്രമോദി വിഭാവനം ചെയ്ത മികച്ച പദ്ധതിയെന്ന് കേന്ദ്രസഹമന്ത്രി സുരേഷ് ഗോപി. പൊന്നാനി ലോക്സഭാ മണ്ഡലത്തിലെ തവനൂര് തപാല് ഓഫീസില് സജ്ജമാക്കിയ പാസ്പോര്ട്ട് സേവാകേന്ദ്രം നാടിന് സമര്പ്പിച്ച് സംസാരിക്കുകയായിരുന്നു മന്ത്രി.
2017ന് ശേഷമാണ് പാസ്പോര്ട്ട് ഓഫീസുകളുടെ എണ്ണം രാജ്യത്ത് വര്ദ്ധിച്ചത്.തപാല് വകുപ്പുമായി സഹകരിച്ച് കൂടുതല് പാസ്പോര്ട്ട് സേവാ കേന്ദ്രങ്ങള് രാജ്യത്ത് വരും- സുരേഷ് ഗോപി പറഞ്ഞു.
ചടങ്ങില് എം.പി.അബ്ദുസമദ് സമദാനി എംപി മുഖ്യാതിഥിയായി. വിദേശകാര്യ മന്ത്രാലയത്തിലെ ജോയിന്റ് സെക്രട്ടറി ബിനോയ് ജോര്ജ്, ഡയറക്ടര് ഓഫ് പോസ്റ്റല് സര്വീസ് വി.ബി.ഗണേഷ് കുമാര്, കോഴിക്കോട് റീജിയണല് പാസ്പോര്ട്ട് ഓഫീസര് അരുണ് മോഹന്, എംഎല്എമാരായ കെ.കെ.ആബിദ് ഹുസൈന് തങ്ങള്, വി.എസ്.ജോയ്, കെ.പി.നൗഷാദ് അലി തുടങ്ങിയവര് സംബന്ധിച്ചു.
