കൊച്ചി: കേന്ദ്ര വനിതാ ശിശു വികസന മന്ത്രാലയം സംഘടിപ്പിക്കുന്ന ബ്രിക്സ് വനിതാ മന്ത്രി തല യോഗം വ്യാഴാഴ്ച സമാപിക്കും. കേന്ദ്ര വനിതാ ശിശുവികസന മന്ത്രി അന്നപൂര്‍ണ ദേവി, സഹമന്ത്രി സാവിത്രി താക്കൂര്‍, മന്ത്രാലയം സക്രട്ടറി അനില്‍ മാലിക്, മന്ത്രി ബിന്ദു കൃഷ്ണ തുടങ്ങിയവര്‍ ഇന്നത്തെ യോഗങ്ങളില്‍ പങ്കെടുത്തു.
ഇന്ത്യയുടെ ബ്രിക്സ് അധ്യക്ഷപദവിയുടെ നാല് പ്രധാന മുന്‍ഗണനകളായ പ്രതിരോധശേഷി, നൂതനരീതികള്‍, സഹകരണം, സുസ്ഥിരത എന്നിവ കേന്ദ്രമന്ത്രി അന്നപൂര്‍ണ ദേവി ഊന്നിപ്പറഞ്ഞു. കൂടുതല്‍ സമത്വവും സ്ത്രീശാക്തീകരണവും ഉറപ്പാക്കുന്ന, എല്ലാവരെയും ഉള്‍ക്കൊളളുന്ന ഭാവിക്കായി, നാം പരസ്പര പങ്കാളിത്തം കൂടുതല്‍ ശക്തിപ്പെടുത്തി, ഒരുമിച്ച് മുന്നേറുകയാണെന്നും മന്ത്രി ചൂണ്ടിക്കാട്ടി.
കേന്ദ്ര സഹമന്ത്രി സാവിത്രി താക്കൂര്‍, പ്രധാനമന്ത്രി നരേന്ദ്ര മോദിയുടെ ദീര്‍ഘദര്‍ശനപരമായ നേതൃത്വത്തില്‍ വനിതാ ശാക്തീകരണത്തിനും സ്ത്രീകള്‍ നയിക്കുന്ന വികസനത്തിനും ഇന്ത്യ നല്‍കുന്ന പ്രാധാന്യം വിശദീകരിച്ചു.തീമാറ്റിക് പാനല്‍ ചര്‍ച്ചകളുടെ പ്ലീനറി സെഷനില്‍ പങ്കെടുത്ത് സംസാരിക്കുകയായിരുന്നു അവര്‍. കേരളത്തിലെ കുടുംബശ്രീ ഉള്‍പ്പെടെ വനിതാ ശാക്തീകരണ പ്രവര്‍ത്തനങ്ങളെ കുറിച്ച് മന്ത്രി ബിന്ദു കൃഷ്ണ സംസാരിച്ചു.
ഇന്ത്യ ഉള്‍പ്പെടെ 11 രാജ്യങ്ങളില്‍ നിന്നുള്ള പ്രതിനിധികള്‍ ആണ് യോഗങ്ങളില്‍ പങ്കെടുക്കുന്നത്. സമ്മേളന വേദിയായ ഗ്രാന്‍ഡ് ഹയാത്ത് ഹോട്ടലില്‍ പ്രത്യേക പ്രദര്‍ശനവും ഒരുക്കിയിട്ടുണ്ട്.
