ആലുവ: വീട് വില്ക്കാനുണ്ടെന്ന് പറഞ്ഞ് സിനിമാ നിര്മ്മാതാവിനെ കബളിപ്പിച്ച് മൂന്നര കോടി രൂപ തട്ടിയെടുത്ത കേസില് യൂത്ത് കോണ്ഗ്രസ് നേതാവും പ്രതിയാവാന് സാധ്യത. 2009ല് ആലത്തൂര് ലോക്സഭാ സീറ്റില് യുഡിഎഫ് സ്ഥാനാര്ത്ഥിയായി മത്സരിച്ച തൃശൂര് സ്വദേശിയായ എന്.കെ. സുധീറിന് നേരെയാണ് പോലീസ് അന്വേഷണം നീങ്ങുന്നത്.
പൊതുമരാമത്ത് വകുപ്പ് 2.75 കോടി രൂപ മതിപ്പുവില കണക്കാക്കിയ രണ്ട് ഏക്കര് സ്ഥലവും ആഢംബര വീടും കേവലം 12 ലക്ഷം രൂപക്ക് വാങ്ങിയതായി ആധാരം രജിസ്റ്റര് ചെയ്തത് തട്ടിപ്പിന്റെ ഭാഗമാണെന്നാണ് പോലീസ് പറയുന്നത്. ഏകദേശം ആറ് കോടിയിലേറെ രൂപ വരുന്ന സ്ഥലവും വീടുമാണിത്.
കേസ് അന്വേഷണത്തിന്റെ ഭാഗമായിട്ടാണ് പോലീസ് വില നിര്ണയത്തിനായി പൊതുമരാമത്ത് (ബില്ഡിംഗ്)നെ സമീപിച്ചത്. ഭിത്തികളെല്ലാം രാജസ്ഥാന് മാര്ബിളില് പൊതിഞ്ഞ വീടിന് 21000 ചതുരശ്ര അടിയാണുള്ളത്. ഇത്തരം ഒരു വീട് 12 ലക്ഷത്തിന് വില്പ്പന നടത്തിയെന്ന രേഖയുണ്ടാക്കണമെങ്കില് തട്ടിപ്പ് സംഘവുമായി അടുത്ത ബന്ധം ഇയാള്ക്ക് ഉണ്ടാവാന് സാധ്യതയുണ്ടെന്നാണ് പോലീസ് അനുമാനിക്കുന്നു. കേസില് സുധീറിന്റെ പങ്ക് അന്വേഷിച്ച് വരികയാണെന്ന് ഡിവൈഎസ്പി വൈ.ആര്. റസ്റ്റം പറഞ്ഞു.
കേസുമായി പിടിയിലായ ഹൈക്കോടതി അഭിഭാഷകന് അഡ്വ. പി.എസ്. സര്വനാഥ (47)നെ 6 വരെ പോലീസ് കസ്റ്റഡിയില് വിട്ടു. മറ്റ് പ്രതികളായ സര്വനാഥന്റെ സഹോദരന് ശ്രീപഴവേലില്, ഭാര്യയും ഗുജറാത്ത് സ്വദേശിനിയുമായ വര്ഷ ബെന്, തട്ടിപ്പിന്റെ മുഖ്യഇടനിലക്കാരനായിരുന്ന സജ്ജീവന് എന്നിവര് അമേരിക്കയിലാണ്. തട്ടിപ്പിന് ശേഷം മൂവരും അമേരിക്കയിലേക്ക് കടക്കുകയായിരുന്നു.
മോഹന്ലാല് ചിത്രമായ ‘പുലിമുരുകന്’ന്റെ നിര്മ്മാതാവും വിദേശ മലയാളിയുമായ ടോമിച്ചന് മുളകുപാടത്തിന്റെ പരാതിയെ തുടര്ന്നാണ് അറസ്റ്റ്. ടോമിച്ചന് നല്കിയ ഹര്ജിയെ തുടര്ന്ന് ഹൈക്കോടതി നിര്ദ്ദേശപ്രകാരം 2014ലാണ് പോലീസ് കേസെടുത്തത്.
