ആലപ്പുഴ: നെഹ്റുട്രോഫി ജലോത്സവത്തില് ചുണ്ടന് വള്ളങ്ങളുടെ മത്സരത്തില് സൈനികരെ തുഴയാന് അനുവദിക്കരുതെന്ന് പ്രമുഖ ബോട്ട് ക്ലബ്ബുകള് ആവശ്യപ്പെട്ടു. ഇതുസംബന്ധിച്ച് നെഹ്റുട്രോഫി ബോട്ട് റേസിങ് സൊസൈറ്റിക്ക് പരാതി നല്കിയതായും ഹൈക്കോടതിയില് ഹര്ജിനല്കിയെന്നും ബോട്ട് ക്ലബ്ബ് ഭാരവാഹികള് പത്രസമ്മളനത്തില് അറിയിച്ചു.
ഇത്തവണ കാരിച്ചാല് ചുണ്ടനില് മത്സരിക്കുന്ന വേമ്പനാട് ബോട്ട് ക്ലബ്ബിലെ ബഹുഭൂരിപക്ഷം തുഴച്ചില് കാരും നാവിക സേനാംഗങ്ങളാണ്. സൈനികരെ കൂടാതെ അവരുടെ പരിശീലകരും ദിവസങ്ങളായി ഇവിടെയുണ്ട്. നല്ല പരിശീലനം ലഭിക്കുന്ന ഇവരുമായി മത്സരിച്ച് ജയിക്കാന് കുട്ടനാട്ടിലെ സാധാരണക്കാരായ തുഴച്ചില്കാര്ക്ക് ബുദ്ധിമുട്ടാണ്.
അനധികൃതമായാണ് ഇവര് മത്സരത്തില് പങ്കെടുക്കുന്നതെന്നും വിവരം ലഭിച്ചിട്ടുണ്ട്. നാവിക സേനയുടെ പേരില് ചുണ്ടന് വള്ളത്തില് മത്സരിക്കുന്നതിന് ആരും എതിരല്ല. എന്നാല് മറ്റു ബോട്ട് ക്ലബ്ബുകളില് അനധികൃതമായി ഇവര് തുഴയുന്നതാണ് പ്രശ്നമാകുന്നത്. ലക്ഷങ്ങള് മുടക്കിയാണ് ബോട്ട് ക്ലബ്ബുകള് നെഹ്റുട്രോഫിക്ക് എത്തുന്നത്. കുട്ടനാടിന്റെയും കേരളത്തിന്റെയും തനതു സംസ്കാരത്തിന്റെ ഭാഗംകൂടിയാണ് ജലോത്സവങ്ങള്.
സൈനികരെ തുഴയാന് അനുവദിക്കുകയാണെങ്കില് വരും വര്ഷങ്ങളില് നാട്ടിലെ തുഴച്ചില്കാര്ക്ക് അവസരം നഷ്ടപ്പെടുകയും കൂടുതല് പണം നല്കി സൈനികരടക്കമുള്ള മറ്റു തുഴച്ചില്കാരെ തേടിപ്പോകുന്ന അവസ്ഥയുമുണ്ടാകും. ഇത് നെഹ്റു ട്രോഫി അടക്കമുള്ള ജലമേളകളുടെ നാശത്തിനു മാത്രമേ ഉപകരിക്കൂവെന്നും അവര് ചൂണ്ടിക്കാട്ടി.
കുമരകം വില്ലേജ് ബോട്ട് ക്ലബ്ബിലെ ജി.പി. ഫെലിക്സ്, സെന്റ് പയസ് ടെന്ത് ബോട്ട് ക്ലബ്ബിലെ ലിനു ജോസ്, കുമരകം ബോട്ടക്ലബ്ബിന്റെ ഉണ്ണി കെ. കാര്ത്തികേയന്, കാട്ടില് തെക്കേതില് ചുണ്ടനിലെ വിജോയ് സുരേന്ദ്രന്, യുബിസിയുടെ എബ്രഹാം കോശി എന്നിവര് പത്രസമ്മേളനത്തില് പങ്കെടുത്തു.
