മുഹമ്മ: കുടുംബശ്രീ യോഗത്തില് മദ്യപിച്ചെത്തിയ യൂവാവിന്റെ ആക്രമണത്തില് വയോധികയടക്കം നാലുപേര്ക്ക് പരിക്ക്. ഇവരെ ആശുപത്രിയില് പ്രവേശിപ്പിച്ചു. മാരാരിക്കുളം തെക്ക് പഞ്ചായത്ത് ആറാം വാര്ഡില് നികര്ത്തില് പത്മാക്ഷി(64), ഭര്ത്താവ് പുഷ്ക്കരന്(70), സമീപവാസികളായ പ്രവീണ്, ഭാര്യ ഹേമ എന്നിവര്ക്കാണ് പരിക്കേറ്റത്.
പട്ടികകൊണ്ടുള്ള അടിയേറ്റ് പുഷ്ക്കരന്റെ തലയ്ക്ക് അഞ്ചോളം തുന്നലുകളുണ്ട്. പ്രവീണിന്റെ തോളില് കടിയേറ്റു. ഞായറാഴ്ച വൈകുന്നേരം നാലോടെ നികര്ത്തില് പത്മാക്ഷിയുടെ വസതിയിലായിരുന്നു സംഭവം. കുടുംബശ്രീയുടെ യോഗത്തില് നിക്ഷേപം സ്വീകരിക്കുന്നതിനിടയിലാണ് ആക്രമണങ്ങളുടെ തുടക്കം. സമീപവാസിയായ തകിടിവെളിയില് കണ്ണന്(39) ആണ് ആക്രമണത്തിന് തുടക്കംകുറിച്ചത്.
പിന്നാലെയെത്തിയ കണ്ണന്റെ സഹോദരങ്ങളും മാതാവും ഇയാളോടൊപ്പം ചേരുകയായിരുന്നു. പുഷ്ക്കരന്റെ കുടുംബവും കണ്ണന്റെ കുടുംബവും തമ്മില് നേരത്തെ അതിരുതര്ക്കമുണ്ടായിരുന്നു. സംഭവത്തില് പ്രതിഷേധിച്ച് വാര്ഡ് സിഡിഎസ്, എഡിഎസ് പ്രവര്ത്തകര് പ്രകടനം നടത്തി. ആക്രമണം നടത്തിയവര്ക്കെതിരെ കേസെടുത്തതായി മണ്ണഞ്ചേരി എസ്ഐ കെ. രാജന്ബാബു പറഞ്ഞു.
