മാവേലിക്കര: സൈക്കിള് മോഷണ കേസ് അന്വേഷിക്കാന് എത്തിയ പോലീസ് കണ്ടത് ദുരൂഹ സാഹചര്യത്തില് സൂക്ഷിച്ചിരുന്ന ബൈക്കുകള്. പുന്നമൂട് ജംഗ്ഷനു സമീപം അനിയന് എന്നയാളിന്റെ വിടിനു പിന്നിലാണ് ബൈക്കുകള് കണ്ടെത്തിയത്. മാന്നാറില് സൈക്കിള് മോഷണത്തിന് പിടിയിലായ പ്രതി മോഷ്ടിച്ച സൈക്കിള് അനിയന് വിറ്റതായി മൊഴി നല്കിയിരുന്നു. ഇതിന്റെ അടിസ്ഥാനത്തില് എസ്ഐ ശ്രീജിത്തിന്റെ നേതൃത്വത്തിലുള്ള സംഘം തെളിവെടുപ്പിനായി അനിയന്റെ വീട്ടില് എത്തി. പരിശോധനയില് വീടിനു പിന്നിലായി മുപ്പതോളം ബൈക്കുകള് സൂക്ഷിച്ചിരിക്കുന്നതായി കണ്ടെത്തി. മോഷ്ടിച്ച സൈക്കിളും ഇവിടെ നിന്നും കണ്ടെത്തി.
ഇതേ തുടര്ന്ന് മാന്നാര് പോലീസ് നല്കിയ വിവരത്തിന്റെ അടിസ്ഥാനത്തില് മാവേലിക്കര പോലീസ് എത്തി അനിയനെ ചോദ്യം ചെയ്തു. പണം വായ്പ നല്കിയതിന് പകരം ഈടായി സ്വീകരിച്ചതാണ് ബൈക്കുകള് എന്നാണ് ഇയാള് പോലീസിന് മൊഴി നല്കിയിരിക്കുന്നത്. എന്നാല് പോലീസ് ഇക്കാര്യം പൂര്ണ്ണമായും വിശ്വസിച്ചിട്ടില്ല. മോഷണ ബൈക്കുകളാണോ ഇതെന്ന് പോലീസ് അന്വേഷിക്കുന്നുണ്ട്. സൂക്ഷിച്ചിരിക്കുന്ന ബൈക്കുകളുടെ നമ്പര് ശേഖരിച്ചതായും തിങ്കളാഴ്ച ആര്ടിഒ ഓഫീസുമായി ബന്ധപ്പെട്ട് വിശദമായ പരിശോധന നടത്തുമെന്നും ഇതിന് ശേഷം തുടര് നടപടികള് സ്വീകരിക്കുമെന്നും മാവേലിക്കര സിഐ പി.ശ്രീകുമാര് പറഞ്ഞു. സിപിഎം പ്രാദേശിക നേതാവിന്റെ അടുത്ത ബന്ധുവാണ് ബൈക്കുകള് സൂക്ഷിച്ച ആള്. പോലീസ് എത്തി പരിശോധന നടത്തിയപ്പോള് മുതല് ഇയാള് നേതാക്കളുമായി ബന്ധപ്പെട്ട് കേസ് അട്ടിമറിക്കാനുള്ള ശ്രമം ആരംഭിച്ചിട്ടുണ്ട്. ഇതിന്റെ ഭാഗമായി നിരവധി നേതാക്കള് പോലീസുമായി ബന്ധപ്പെട്ടതായും കേസ് നിസ്സാരവത്ക്കാനുള്ള നീക്കം ആരംഭിച്ചതായും ആക്ഷേപം ഉയര്ന്നിട്ടുണ്ട്.
