ആലപ്പുഴ: സ്കൂളിനുമുകളിലേയ്ക്ക് ചാഞ്ഞുനിന്ന തെങ്ങില്നിന്ന് തേങ്ങ പതിച്ചതിനെത്തുടര്ന്ന് പൊട്ടിവീണ ഓടിന്റെ കഷണം ക്ലാസിലിരുന്ന കുട്ടിയുടെ തലയില് തട്ടി പരുക്കേറ്റ സംഭവത്തില് നഷ്ടപരിഹാരമായി കുട്ടിക്ക് 30,000 രൂപ നല്കാന് സംസ്ഥാന ബാലാവകാശ സംരക്ഷണ കമ്മീഷന് തദ്ദേശസ്വയംഭരണ സെക്രട്ടറിക്ക് നിര്ദ്ദേശം നല്കി. സ്കൂളിനുസമീപത്തെ വീട്ടുവളപ്പില്നിന്ന തെങ്ങില്നിന്ന് തേങ്ങ വീണാണ് അപകടം സംഭവിച്ചത്.
ആലപ്പുഴ മാവേലിക്കര മറ്റം സെന്റ് ജോണ്സ് എച്ച്.എസ്സ്.എസ്സ് വിദ്യാര്ഥിനി മാവേലിക്കര ഈരേഴ വടക്കുമുറി കുഴിവേലില് വീട്ടില് ലേഖ എസ്സ്. രാജന്റെ മകള് സാന്ദ്ര രാജനാണ് ശാരീരികക്ഷതത്തിനും മാനസികാഘാതത്തിനുമുളള നഷ്ടപരിഹാരം എന്ന നിലയില് 30,000 രൂപ ലഭിക്കുന്നത്. കോടതിവിധിക്ക് അനുസൃതമായി തുക റവന്യൂ റിക്കവറിയിലൂടെ തെങ്ങിന്റെ ഉടമയില്നിന്ന് സര്ക്കാരിന് തിരികെ ഈടാക്കാമെന്നും കമ്മീഷന് വ്യക്തമാക്കി.
അപകടാവസ്ഥയിലുളള തെങ്ങ് വെട്ടിമാറ്റണമെന്നാവശ്യപ്പെട്ട് സ്കൂള് അധികൃതര് മാവേലിക്കര മുനിസിപ്പാലിറ്റിക്കും റവന്യൂവകുപ്പിനും പരാതി നല്കിയിരുന്നെങ്കിലും നടപടി സ്വീകരിച്ചിരുന്നില്ലെന്ന് കമ്മീഷന് കണ്ടെത്തി. അപകടത്തിനുശേഷം പൊലീസ് സഹായത്തോടെയാണ് മുനിസിപ്പാലിറ്റി തെങ്ങ് നീക്കം ചെയ്തത്. വിഷയം റവന്യൂ അധികൃതരുടെ പരിഗണനയിലാണെന്ന് സ്ഥലം ഉടമ അറിയിച്ചതിനെത്തുടര്ന്നാണ് നടപടി സ്വീകരിക്കാന് കഴിയാതെ പോയതെന്ന മുനിസിപ്പാലിറ്റിയുടെ വാദം കമ്മീഷന് അംഗീകരിച്ചില്ല.
ഏതെങ്കിലും അധികാരിയുടെ പരിഗണനയിലുളള വിഷയം ആണെന്നതുകൊണ്ടുമാത്രം തന്നില് നിക്ഷിപ്തമായ അധികാരം ഉദ്യോഗസ്ഥര് വിനിയോഗിക്കാത്തത് അംഗീകരിക്കാനാവില്ലെന്ന് കമ്മീഷന് നിരീക്ഷിച്ചു. തദ്ദേശസ്വയംഭരണ സ്ഥാപനങ്ങളുടെ അധീനതയിലുളള വിദ്യാലയങ്ങളിലെ പ്രശ്നങ്ങള് പോലും ഗൗരവമായിക്കണ്ട് പരിഹരിക്കാന് കഴിയാത്ത സാഹചര്യം മാറ്റപ്പെടേണ്ടതാണെന്ന് കമ്മീഷന് അദ്ധ്യക്ഷ ശോഭാ കോശി, അംഗം ജെ. സന്ധ്യ എന്നിവരടങ്ങിയ ഡിവിഷന് ബെഞ്ച് അഭിപ്രായപ്പെട്ടു.
ഇക്കാര്യത്തില് സ്വീകരിച്ച നടപടികള് സെപ്റ്റംബര് ഒന്പതിനകം അറിയിക്കണമെന്നും കമ്മീഷന് ആവശ്യപ്പെട്ടിട്ടുണ്ട്.
