ചക്കരക്കല് മേഖലയില് പ്രകോപനമുണ്ടാക്കി അക്രമത്തിന് സിപിഎം നീക്കം
കണ്ണൂര്: ചക്കരക്കല് മേഖലയില് പ്രകോപനമുണ്ടാക്കി അക്രമത്തിന് സിപിഎം നീക്കം. ഇതിന്റെ ഭാഗമാണ് ചക്കരക്കല് കണയന്നൂരില് സമാധാനപരമായി അക്ഷരശ്രീ സംഘത്തിന്റെ യോഗം നടക്കുകയായിരുന്ന വീട്ടിലേക്ക് നൂറുകണക്കിനു വരുന്ന സിപിഎം സംഘം ഇരച്ചുകയറി അക്രമം നടത്തിയ സംഭവം. അക്രമത്തില് പരിക്കേറ്റ് നിരവധി സംഘപരിവാര് പ്രവര്ത്തകര് വിവിധ ആശുപത്രികളില് ചികിത്സയിലാണ്. ഏറെ നാളുകളിലെ തുടര്ച്ചയായ അക്രമസംഭവങ്ങള്ക്ക് ശേഷം സാവധാനം സമാധാനത്തിലേക്ക് മടങ്ങുകയായിരുന്ന ചക്കരക്കല്ല് മേഖലയില് ആസൂത്രിതമായി വീണ്ടും അക്രമങ്ങള് കുത്തിപ്പൊക്കി അരാജകത്വം സൃഷ്ടിക്കാനുള്ള സിപിഎമ്മിന്റെ ഗൂഡാലാചനയാണ് കണയന്നൂര് അക്രമം ചൂണ്ടിക്കാട്ടുന്നത്. കഴിഞ്ഞ ഏതാനും മാസങ്ങളായി സിപിഎം ചക്കരക്കല്ല് മേഖലയില് സംഘപരിവാര് പ്രവര്ത്തകര്ക്കും സ്ഥാപനങ്ങള്ക്കും വീടുകള്ക്കും നേരെ വ്യാപകമായ അക്രമങ്ങള് നടത്തിവരികയായിരുന്നു. ആര്എസ്എസ് നേതാക്കളുടെ വീടുകള്ക്ക് നേരെ ബോംബെറിഞ്ഞ സംഭവങ്ങളും ഉണ്ടായിരുന്നു. എന്നാല് സംഘപരിവാര് പ്രസ്താനങ്ങള് ആത്മസംയമനം പാലിച്ചതിനാല് മേഖലയില് കഴിഞ്ഞ കുറച്ച് ആഴ്ചകളായി പരിപൂര്ണ സമാധാനം നിലനിന്നുവരികയാണ്. ഇതിനിടയിലാണ് കഴിഞ്ഞദിവസം രാത്രി അക്ഷയശ്രീ രൂപീകരണയോഗത്തിലേക്ക് സിപിഎം നേതാക്കളുടെ നേതൃത്വത്തില് ഇരച്ചുകയറി അക്രമം നടത്തിയത്. അക്രമത്തില് വിനീഷ് എന്ന ആര്എസ്എസ് പ്രവര്ത്തകന് ഗുരുതരമായി പരിക്കേല്ക്കുകയും ചെയ്തിട്ടുണ്ട്. ഇയാളെ ജാതിപ്പേര് വിളിച്ച് ആക്ഷേപിച്ചുകൊണ്ടാണ് സിപിഎം സംഘം അക്രമിച്ചത്. വിനീഷ് ആശുപത്രിയില് ചികിത്സയിലാണ്. അക്ഷയശ്രീ രൂപീകരണയോഗത്തില് പ്രദേശത്തെ സിപിഎമ്മുകാരായ നിരവധി യുവാക്കളുള്പ്പെടെ സംബന്ധിച്ചിരുന്നു. ഇതില് വിറളിപൂണ്ടാണ് യോഗം അലങ്കോലപ്പെടുത്തിയത്. ചക്കരക്കല്ല് മേഖലയിലെ പല അക്രമങ്ങള്ക്കും നേതൃത്വം നല്കിയ സിപിഎം ക്വട്ടേഷന് സംഘം തന്നെയാണ് ചെമ്പിലോട് പഞ്ചായത്തിലെ കണയന്നൂരിലും അക്രമം നടത്തിയത്. മേഖലയിലെ സിപിഎം അക്രമങ്ങള്ക്ക് എല്ലാവിധ സഹായങ്ങളും ചെയ്യുന്ന നടപടിയാണ് പോലീസിന്റെ ഭാഗത്തു നിന്നും എല്ലാ കാലത്തും ഉണ്ടായിരുന്നത്. ഇതാണ് സിപിഎം അക്രമികള്ക്ക് അഴിഞ്ഞാടാന് പ്രചോദനമായി മാറുന്നതെന്ന് നാട്ടുകാര് പറയുന്നു. മേഖലയില് സിപിഎം ഏകപക്ഷീയമായി അക്രമം നടത്തുമ്പോള് മാധ്യമങ്ങള് സംഘര്ഷം എന്ന രീതിയില് ചിത്രീകരിക്കുന്നതിനും വ്യാപക പ്രതിഷേധമുയര്ന്നിട്ടുണ്ട്. കണയന്നൂരില് നടന്ന അക്രമത്തില് ബിജെപി ധര്മ്മടം മണ്ഡലം കമ്മറ്റിയും ചെമ്പിലോട് പഞ്ചായത്ത് കമ്മറ്റിയും ശക്തമായി പ്രതിഷേധിച്ചു. അക്രമങ്ങളില് നിന്ന് പിന്തിരിയാന് സിപിഎം നേതൃത്വം തയ്യാറാവണമെന്നും ബിജെപി ആവശ്യപ്പെട്ടു.
പ്രതികരിക്കാൻ ഇവിടെ എഴുതുക: