കൂത്തുപറമ്പ്: സ്പെഷ്യല് ഒളിമ്പിക്സില് വെള്ളിമെഡല് നേടിയ മുഹമ്മദ് അജ്മലിന വേങ്ങാട് ഇകെഎന്എസ്എസ് ഗവ ഹയര് സെക്കന്ററി സ്കൂളിലെ നാഷണല് സര്വ്വീസ് സ്കീം നിര്മ്മിച്ചു നല്കുന്ന സ്നേഹവീടിന് തറക്കല്ലിട്ടു. മുഖ്യമന്ത്രിയുടെ മണ്ഡലം പ്രതിനിധി പി.ബാലന് തറക്കല്ലിടല് കര്മ്മം നിര്വഹിച്ചു.
അമേരിക്കയില് നടന്ന സ്പെഷ്യല് ഒളിമ്പിക്സില് ഇന്ത്യയെ പ്രതിനിധീകരിച്ച് പങ്കെടുത്ത ഹാന്റ്ബോള് ടീമിന്റെ ക്യാപ്റ്റനാണ് മുഹമ്മദ് അജ്മല്. അജ്മലും സഹോദരിയും ഭിന്നശേഷിയുള്ളവരാണ്. പിതാവ് മരണമടഞ്ഞതിനാല് മാതാവും കൂലിപ്പണിക്കാരായ സഹോദരനുമാണ് കുടുംബം പുലര്ത്തുന്നത്. സ്വന്തമായി വീടില്ലാത്ത ഇവര് ഇപ്പോള് വാടകവീട്ടില് കഴിയുകയാണ്. ഇതറിഞ്ഞ വേങ്ങാട് ഹയര് സെക്കന്ററി സ്കൂളിലെ എന്എസ്എസ് യൂണിറ്റാണ് ഇവര്ക്ക് സ്നേഹവീട് നിര്മ്മിച്ചു നല്കാന് തീരുമാനിച്ചത്.
ചടങ്ങില് പഞ്ചായത്ത് പ്രസിഡണ്ട് സി.പി.അനിത അധ്യക്ഷത വഹിച്ചു. പിടിഎ പ്രസിഡണ്ട് പി.പവിത്രന്, കെ.വി.ജയരാജന്, ജയരാജന് മാസ്റ്റര്, പ്രദീപന് തൈക്കണ്ടി, എ.ബാലകൃഷ്ണന് മാസ്റ്റര്, ഷിനിത്ത് പാട്യം, സി.പി.പ്രശാന്ത്, പ്രിന്സിപ്പാള് കെ.ഒ.ഉണ്ണികൃഷ്ണന്, എന്.പി.കരുണന്, എ.കൃഷ്ണന് മാസ്റ്റര്, സി.പി.പ്രദീപന് തുടങ്ങിയവര് സംസാരിച്ചു. തലശ്ശേരി ബ്ലോക്ക് പഞ്ചായത്ത് മെമ്പര് സി.കെ.പുരുഷോത്തമന്റെ നേതൃത്വത്തില് സൗജന്യമായാണ് തറയുടെയും ചുമരുകളുടെയും പ്രവൃത്തി നടത്തിവരുന്നത്.
