ഇരിട്ടി: കൊതുകുജന്യ രോഗങ്ങള്ക്കെതിരെ ജാഗ്രത പാലിക്കുന്നതിന്റെ ഭാഗമായി ഇരിട്ടി മുനസിപ്പാലിറ്റി, ഇരിട്ടി താലൂക്ക് ആശുപത്രി പൊതുജനാരോഗ്യ വിഭാഗം എന്നിവയുടെ ആഭിമുഖ്യത്തില് മഴക്കാല പൂര്വ പകര്ച്ചവ്യാധി ബോധവല്ക്കരണ കാമ്പയിന് സംഘടിപ്പിച്ചു. ഇരിട്ടി മഹാത്മാ ഗാന്ധി കോളേജിലേയും, ഇരിട്ടി ഹയര്സെക്കന്ഡറി സ്കൂളിലെയും എന് എസ് എസ് വളണ്ടിയര്മാര് തുടങ്ങിയവര് കാബൈനില് പങ്കാളികളായി. എം ജി കോളേജിലെ നാലും , ഇരിട്ടി ഹയര്സെക്കന്ഡറി സ്കൂളിലെ ഏഴും ബാച്ച് വിദ്യാര്ഥികള് 11 ബാച്ചുകളായി തിരിഞ്ഞ് ഇരിട്ടി പട്ടണത്തിന്റെ പരിധിയിലെ ഇരിട്ടി ടൗണ്, പയഞ്ചേരി, പഴയ പാലം, കീഴൂര്, കൂളിച്ചമ്പ്ര തുടങ്ങിയ നാലോളം വാര്ഡുകളിലെ മുഴുവന് വീടുകളിലും കയറിയിറങ്ങി ബോധവല്ക്കരണവും ലഘുലേഘ വിതരണവും നടത്തി.
ബോധവല്ക്കരണ പരിപാടിയുടെ ഉദ്ഘാടനം ഇരിട്ടി പഴയ ബസ്സ്സ്റ്റാന്റ് പരിസരത്തു മുന്സിപ്പല് കൗണ്സിലര് റുബീന റഫീക്ക് ആരോഗ്യ വകുപ്പിന്റെ ബോധവല്ക്കരണ ലഘുലേഘ എന്എസ്എസ് വളണ്ടിയര്മാര്ക്ക് നല്കിക്കൊണ്ട് നിര്വഹിച്ചു. ഹെല്ത്ത് ഇന്സ്പെക്ടര് പി.പി. അബ്ദുള് റഷീദ്, ജൂനിയര് ഹെല്ത്ത് ഇന്സ്പെക്ടര് രാജേഷ് വി. ജയിംസ്, ജൂനിയര് പബ്ലിക്ക് ഹെല്ത്ത് ഇന്സ്പെക്ടര് ഗിരിജാ കുമാരി എന്നിവര് പ്രസംഗിച്ചു.
