വാഷിങ്ടണ്: പ്രതിരോധ, ഊര്ജ്ജ മേഖലകളിലടക്കം കൂടുതല് സഹകരണത്തിന്റെ പാത വെട്ടിത്തുറന്ന് പ്രധാനമന്ത്രി നരേന്ദ്ര മോദിയും യുഎസ് പ്രസിഡന്റ് ബരാക്ക് ഒബാമയും. നരേന്ദ്ര മോദിയുടെ യുഎസ് സന്ദര്ശനത്തിന്റെ ഭാഗമായി വൈറ്റ് ഹൈസില് നടത്തിയ കൂടിക്കാഴ്ചയില് എട്ടു മേഖലകളില് യോജിച്ച് പ്രവര്ത്തിക്കാന് ഇരു രാജ്യങ്ങളും കരാറിലെത്തി. ഭീകരവിരുദ്ധ പോരാട്ടത്തിലെ സഹകരണവും പട്ടികയില്.
കരാറുകള് ഇങ്ങനെ:-
1. ഭീകര വിരുദ്ധ പോരാട്ടത്തില് വിവരങ്ങള് പരസ്പരം കൈമാറല്. ഭാരതത്തിലെ രഹസ്യാന്വേഷണ ഏജന്സികളും യുഎസിലെ ടൈററിസം സ്ക്രീനിങ് സെന്ററുമാണ് സഹകരിച്ചു പ്രവര്ത്തിക്കുക. ഇരു രാജ്യങ്ങളിലെയും നിയമങ്ങള്ക്കുള്ളില് നിന്നാകും പ്രവര്ത്തനം.
2. ഊര്ജ്ജ മേഖലയില് സഹകരണം വര്ധിപ്പിക്കും. ഊര്ജ്ജ സുരക്ഷിതത്വം, കാലാവസ്ഥാ വ്യതിയാനം തുടങ്ങിയ മേഖലകളില് ഒന്നിച്ചു പ്രവര്ത്തിക്കും. കാലാവസ്ഥാ വ്യതിയാനവുമായി ബന്ധപ്പെട്ടുള്ള പാരീസ് ഉടമ്പടി നടപ്പാക്കുന്നതിന് പ്രതിജ്ഞാബദ്ധമാകും. ശുദ്ധോര്ജത്തിനും, പുനരുപയോഗ ഊര്ജം 175 ജിഗാവാട്ട് ഉത്പാദനത്തിനും യുഎസ് സഹായം നല്കും. ആണവോര്ജ മേഖലയിലും സഹകരണം. ഭാരതത്തില് ആറ് ആണവ റിയാക്റ്ററുകള് നിര്മിക്കാനുള്ള പദ്ധതിക്ക് സാമ്പത്തിക സഹായം.
3. മൃഗസംരക്ഷണം, വന്യജീവികളെ വേട്ടയാടല് തടയല് എന്നിവയ്ക്ക് സംയുക്തശ്രമം. വൈല്ഡ്ലൈഫ് ഫോറന്സിക്, ജനിതകശാസ്ത്ര സംരക്ഷണം, പ്രകൃതിദത്തമായ വന്യജീവി സംരക്ഷണ കേന്ദ്രങ്ങളുടെ പരിപാലനം, പ്രകൃതിയെക്കുറിച്ചുള്ള പഠനവും സംരക്ഷണവും തുടങ്ങിയ മേഖലകളില് കൈകോര്ക്കും.
4. പാസ്പോര്ട്ട്, വിസ നടപടികള് ലഘൂകരിക്കുന്നതിന് ഭാരത വിദേശകാര്യ മന്ത്രാലയവും യുഎസ് കസ്റ്റംസ് ആന്ഡ് ബോര്ഡര് പ്രൊട്ടക്ഷന്, ആഭ്യന്തര സുരക്ഷാ മന്ത്രാലയങ്ങളുമായി ധാരണ. ഇതനുസരിച്ച് യുഎസിലെത്തുന്ന ഭാരതീയര്ക്ക് വേഗത്തില് എമിഗ്രേഷന് അനുമതി. തെരഞ്ഞെടുത്ത വിമാനത്താവളങ്ങളില് ഇതിനു സൗകര്യം. ഇരു രാജ്യങ്ങളുടെയും സൂക്ഷ്മ പരിശോധനയിലൂടെയാകും നടപടി. സാധാരണ യാത്രക്കാര്ക്കാകും ഏറെ പ്രയോജനം.
5. ഭാരത-യുഎസ് നാവികസേനകള് സഹകരിക്കും. കടലുമായി ബന്ധപ്പെട്ട് രഹസ്യസ്വഭാവമില്ലാത്ത വിവരങ്ങള് പങ്കുവയ്ക്കും. ഇരു രാജ്യങ്ങളുടെയും നിയമങ്ങളും ചട്ടങ്ങളും അനുസരിച്ച് സഹകരണം.
6. ഭാരത പെട്രോളിയം പ്രകൃതിവാതക മന്ത്രാലയവും യുഎസ് ഊര്ജ്ജ മന്ത്രാലയവും പരസ്പര സഹകരണത്തിന് കരാര്. വാതക ശേഖരങ്ങള് കണ്ടെത്തല്, ഉത്പാദനം, വിതരണം ഇവയിലെല്ലാം യോജിച്ച് പ്രവര്ത്തിക്കും. ഇരു രാജ്യങ്ങളിലുമുള്ള പര്യവേഷണങ്ങളിലും സഹകരിക്കും.
7. എയര്ക്രാഫ്റ്റ് കരിയര് സാങ്കേതികവിദ്യാ രംഗത്ത് വിവരങ്ങള് പരസ്പരം കൈമാറുന്നതിനു പദ്ധതി. ഭാരതത്തിനും യുഎസിനുമിടയിലുള്ള എയര്ക്രാഫ്റ്റ് കരിയറുകളുടെ വിവരങ്ങളും വസ്തുതകളും പങ്കുവയ്ക്കും. ഇരു രാജ്യങ്ങളുടെയും പ്രതിരോധ മന്ത്രാലയങ്ങളാണ് കരാര് ഒപ്പിട്ടത്.
8. സൈനികവിന്യാസ ശാസ്ത്രവുമായി ബന്ധപ്പെട്ടുള്ള സഹകരണത്തിനും കരാര്. ഇതനുസരിച്ച് തുറമുഖ സന്ദര്ശം, സംയുക്ത സൈനികാഭ്യാസം, മനുഷ്യത്വ-ദുരന്തനിവാരണ രംഗത്ത് പരിശീലനം തുടങ്ങിയ മേഖലകളില് സഹകരിക്കും. പ്രതിരോധ മന്ത്രാലയങ്ങളാണ് ഈ കരാറിലും ഒപ്പിട്ടത്.
