പറവൂര്‍: തെരഞ്ഞെടുപ്പ് പ്രവര്‍ത്തനത്തിന്റെ മൂന്നാം ഘട്ടത്തില്‍ പറവൂരില്‍ മത്സരം കടുക്കുന്നു. എന്‍ഡിഎ സ്ഥാനാര്‍ത്ഥി ഹരി വിജയനും യുഡിഎഫ് സ്ഥാനാര്‍ത്ഥി വി.ഡി. സതീശനും തമ്മിലാണ് ശക്തമായ മത്സരം നടക്കുന്നത്. പ്രചരണരംഗത്ത് എല്‍ഡിഎഫ് മൂന്നാം സ്ഥാനത്തേയ്‌ക്ക് പിന്‍ന്തള്ളപ്പെട്ടു കഴിഞ്ഞു. പറവൂരില്‍ രൂപപ്പെട്ടിട്ടുള്ള യുഡിഎഫ് എല്‍ഡിഎഫ് ബാന്ധവത്തിന്റെ ഭാഗമായിട്ടാണ് എല്‍ഡിഎഫ് മൂന്നാം സ്ഥാനത്തേയ്‌ക്ക് പിന്‍ന്തള്ളപ്പെട്ടിരിക്കുന്നത്.
ഏഴിക്കര പഞ്ചായത്തിലുള്ള ഏതാനും സിപിഎം പ്രവര്‍ത്തകര്‍ തെരഞ്ഞെടുപ്പ് പ്രവര്‍ത്തനത്തില്‍ നിന്ന് മാറി സ്വന്തം സ്ഥാനാര്‍ത്ഥി മത്സരിക്കുന്ന തൊട്ടടുത്ത മണ്ഡലമായ വൈപ്പിനില്‍ പ്രവര്‍ത്തനങ്ങളില്‍ സജീവമാണ്. ചിട്ടയായതും അച്ചടക്കത്തോടെയും ഉള്ള പ്രവര്‍ത്തനത്തിലൂടെയാണ് എന്‍ഡിഎ പ്രവര്‍ത്തന രംഗത്ത് മുന്നിലേയ്‌ക്ക് വന്നത്. സ്ഥാനാര്‍ത്ഥി ഹരിവിജയന്‍ മണ്ഡലത്തിലെ പ്രധാന വ്യക്തികളേയും സാമുദായിക നേതാക്കളേയും വോട്ടര്‍മാരേയും നേരില്‍ കണ്ട് വോട്ട് അഭ്യര്‍ത്ഥിച്ചു. സ്ഥാനാര്‍ത്ഥി ചെല്ലുന്നിടത്തെല്ലാം മാറ്റം ആഗ്രഹിച്ച് നൂറ് കണക്കിന് ആളുകളാണ് സ്വീകരിക്കുന്നത്. കുടുംബയോഗങ്ങളില്‍ സജീവമായി പങ്കെടുത്ത് വരികയാണ് സ്ഥാനാര്‍ത്ഥി. 4 മുതല്‍ 12 വരെ തുറന്ന വാഹനത്തില്‍ പ്രചരണം ആരംഭിക്കും . 5 ന് ബിജെപി ദേശീയ അദ്ധ്യക്ഷന്‍ അമിത്ഷാ പറവൂരില്‍ എത്തുന്നതോടു കൂടി പ്രചരണം ഒന്നുകൂടി ശക്തമാകും. ദേശീയ അദ്ധ്യക്ഷന്‍ പറവൂരില്‍ എത്തുന്നതിന്റെ സന്തോഷത്തിലാണ് പ്രവര്‍ത്തകര്‍. അമിത് ഷായുടെ വരവോടെ എന്‍ഡിഎക്ക് മേല്‍ക്കൈ നേടാന്‍ സാധിക്കുമെന്ന കണക്ക് കൂട്ടലിലാണ് നേതൃത്വം. അമിത്ഷായെ സ്വീകരിക്കാന്‍ പറവൂര്‍ ഒരുങ്ങി കഴിഞ്ഞു.
