കൊച്ചി: വാത്തുരുത്തിയുടെ സമഗ്ര വികസനത്തിന് മാസ്റ്റര് പ്ലാന് തയാറാക്കുമെന്ന് എറണാകുളം നിയോജക മണ്ഡലം ബിജെപി സ്ഥാനാര്ഥി എന്.കെ. മോഹന്ദാസ്. എറണാകുളം നഗരം മെട്രോയാണെന്ന് പറയുമ്പോഴും വാത്തുരുത്തി പോലെയുള്ള കോളനികളിലെ മനുഷ്യ ജീവിതം ദുസ്സഹമാണ്. കുടിവെള്ള ക്ഷാമം, ശൗച്യാലയങ്ങളുടെ അപര്യാപ്തത, വൃത്തി ഹീനമായ ചുറ്റുപാടുകള്, സുരക്ഷിതത്വമില്ലായ്മ തുടങ്ങി വാത്തുരുത്തി നേരിടുന്ന ഭീഷണികള് ഇല്ലാതാക്കാന് കൂട്ടായി ശ്രമിക്കും.
വാത്തുരുത്തിയിലെ ജനങ്ങള്ക്ക് ഹെല്ത്ത്, ലേബര് കാര്ഡുകള് വിതരണം ചെയ്യും. മാതൃഭാഷ കൂടി ഉള്പ്പെടുത്തിയുള്ള വിദ്യാഭ്യാസം കോളനികളിലെ കുട്ടികള്ക്ക് ഉറപ്പാക്കും. റയില്വേ ലൈനില് അപകടം പതിവാകുന്നത് തടയാന് കേന്ദ്ര അധികൃതരുമായി ബന്ധ്പ്പെട്ട് സുരക്ഷാ ക്രമീകരണങ്ങള് ഒരുക്കും. മാതാപിതാക്കള് ജോലിക്ക് പോകുന്ന വീടുകളിലെ കുട്ടികളുടെ സംരക്ഷണത്തിന് ഡേ കെയര് കൊണ്ടുവരും. മദ്യത്തിനും മയക്കുമരുന്നിനുമെതിരെ ബോധവത്ക്കരണ പരിപാടികള് സംഘടിപ്പിക്കുമെന്നും മോഹന്ദാസ് പറഞ്ഞു. കലൂര് മേഖലയില പ്രചാരണം നടത്തിയ സ്ഥാനാര്ഥി പദയാത്രയിലും പങ്കെടുത്തു. കലൂര് മുതല് പൊറ്റക്കുഴി വഴി പുതുക്കലവട്ടം വരെയായിരുന്നു വാദ്യ മേളങ്ങളുടെ അകമ്പടിയോടെ പദയാത്ര. പ്രചാരണ പരിപാടികളില് വി.പി. സന്തോഷ്കുമാര്, രമേശ് വാത്തുരുത്തി, സി.ജി. രാജഗോപാല്, തേവര സന്തോഷ്കുമാര്, കെ.എസ്. സുരേഷ് കുമാര്, അഡ്വ. കെ.എസ്. ഷൈജു എന്നിവരുമുണ്ടായിരുന്നു.
