ആലുവ: കൊണ്ടും കൊടുത്തും മുന്നണികള് കത്തി കയറിയപ്പോള് ആലുവ പ്രസ് ക്ലബ് സംഘടിപ്പിച്ച സ്ഥാനാര്ത്ഥി സംഗമം ആവേശകരമായി. രണ്ട് മണിക്കൂറോളം നീണ്ടുനിന്ന സംഗമത്തില് മണ്ഡലത്തിന്റെ നീറുന്ന പ്രശ്നങ്ങള് വികസന സാധ്യതകളും സജീവ ചര്ച്ചയായി. മാലിന്യ പ്രശ്നവും മദ്യനയവും ചര്ച്ച ചൂടുപിടിപ്പിച്ചു. ആലുവ മണ്ഡലത്തിന്റെ സമഗ്ര വികസന പദ്ധതികളുമായിട്ടാണ് മുന്നണി സ്ഥാനാര്ത്ഥികള് വോട്ടര്മാരെ സമീപിച്ചത്.
മണ്ഡലത്തില് വികസന പ്രവര്ത്തനങ്ങളൊന്നും നടന്നിട്ടില്ലെന്നും മണ്ഡലത്തിലെ അംഗനവാടികളുടെ അവസ്ഥ പോലും ശോചനീയമാണെന്നും എന്ഡിഎ സ്ഥാനാര്ത്ഥി ലതാ ഗംഗാധരന് ചൂണ്ടികാട്ടി. വന്കിട പാലങ്ങള്ക്കും കെട്ടിടങ്ങള്ക്കും പകരം സാധാരണക്കാരുടെ ജീവിത നിലവാരം ഉയര്ത്തുന്നതിനുള്ള പ്രവര്ത്തനങ്ങളാണ് ആവശ്യം. മണ്ഡലത്തിന്റെ സമഗ്ര വികസനത്തിനായി വിവിധ കേന്ദ്രാവിഷ്കൃത പദ്ധതികള് നടപ്പാക്കും. മണ്ഡലത്തിലെ പട്ടികജാതി കോളനികളുടെ അവസ്ഥ അതിദയനീയമാണ്. അശാസ്ത്രീയമായി ഫണ്ട് ചെലവഴിക്കുന്നത് അടിസ്ഥാന വികസനത്തെ ബാധിക്കുകയാണെന്നും ലതാ ഗംഗാധരന് ആരോപിച്ചു.
തൊഴിലില്ലായ്മ പരിഹരിക്കാന് ആലുവയില് ഐ.ടി ഹബും കുടിവെള്ള ക്ഷാമം പരിഹരിക്കാന് ജലനിധി പദ്ധതിയും യാഥാര്ത്ഥ്യമാക്കുമെന്ന പ്രഖ്യാപനവുമായാണ് യുഡിഎഫ് സ്ഥാനാര്ത്ഥി അന്വര് സാദത്ത് പറഞ്ഞു. മണപ്പുറത്തേക്ക് പാലം നിര്മ്മിച്ചതുമായി ബന്ധപ്പെട്ട ആക്ഷേപവുമായാണ് എല്ഡിഎഫ് സ്ഥാനാര്ത്ഥി വി. സലീം ചര്ച്ചയാരംഭിച്ചത്.
പ്രസ് ക്ലബ് പ്രസിഡന്റ് എം.ജി. സുബിന് അദ്ധ്യക്ഷത വഹിച്ചു. ആലുവ പരിസ്ഥിതി സംരക്ഷണ സംഘം സെക്രട്ടറി ചിന്നന് ടി. പൈനാടത്ത് മോഡറേറ്ററായിരുന്നു. പ്രസ് ക്ലബ് സെക്രട്ടറി കെ.സി. സ്മിജന് സ്വാഗതവും രക്ഷാധികാരി ശ്രീമൂലം മോഹന്ദാസ് നന്ദിയും പറഞ്ഞു.
