അങ്കമാലി: 25 വര്‍ഷമായി മാറി മാറി ഭരിച്ച യുഡിഎഫ്, എല്‍ഡിഎഫ് മുന്നണികള്‍ ദീര്‍ഘവീഷണമില്ലാതെ അശാസ്ത്രീയമായി നടത്തിയ വികസനങ്ങള്‍ സ്വയം വികസിക്കുന്നതിനുവേണ്ടിമാത്രമായിരുന്നുവെന്ന് അങ്കമാലി എന്‍ഡിഎ സ്ഥാനാര്‍ത്ഥി പി.ജെ. ബാബു വാര്‍ത്താസമ്മേളനത്തില്‍ പറഞ്ഞു. കേരളത്തില്‍ നിന്ന് ഏറ്റവും കൂടുതല്‍ വിദ്യാര്‍ത്ഥികള്‍ പുറത്ത് പഠിക്കുവാന്‍ പോകുന്നത് അങ്കമാലിയില്‍ നിന്നാണ്. ഇതിന് പരിഹാരം കാണുന്നതിന് അങ്കമാലി എജ്യുക്കേഷന്‍ ഹമ്പായി ഉയര്‍ത്തേണ്ടതുണ്ട്. ഇതിന് എല്‍ഡിഎഫും യുഡിഎഫും ഇതുവരെ ഒന്നും ചെയ്തിട്ടില്ല. എന്‍ഡിഎ ഭരണത്തില്‍ വന്നാല്‍ ഇതിന് പരിഹാരം കാണും, കാര്‍ഷിക മേഖലയുടെ വളര്‍ച്ചയാണ് വേണ്ടത്. കാര്‍ഷിക മേഖല വളര്‍ന്നാല്‍ മാത്രമെ അങ്കമാലിക്ക് വളര്‍ച്ചയുണ്ടാകൂവെന്നും അദ്ദേഹം പറഞ്ഞു. ഇരുമുന്നണികളും ജനതയെ പറ്റിക്കുവാനാണ് ഇപ്പോഴും ശ്രമിക്കുന്നത്. ഇത് മനസിലാക്കി വോട്ട് ചെയുമെന്നും പി.ജെ. ബാബു വ്യക്തമാക്കി. അങ്കമാലി പ്രസ് ക്ലബില്‍ നടന്ന വാര്‍ത്താസമ്മേളനത്തില്‍ ബിജെപി ജില്ല സെക്രട്ടറി എം.എ. ബ്രഹ്മ രാജ്, അഡ്വ.തങ്കച്ചന്‍ വര്‍ഗീസ്, ബിജു പുരുഷോത്തമന്‍ തുടങ്ങിയവര്‍ പങ്കെടുത്തു.
പി.ജെ. ബാബു മൂക്കന്നൂര്‍ പഞ്ചായത്തിലെ വിവിധ മേഖലകളില്‍ വോട്ട് അഭ്യര്‍ത്ഥിച്ചു. മൂക്കന്നുര്‍ ഫൊറോന പള്ളി, മൂക്കന്നര്‍ ഐടിസി, ആഴകം പള്ളി ആഴകം ജംഗ്ഷന്‍, ആശുപത്രി പടിക്കവല, പലാക്കവല തുടങ്ങിയ സ്ഥലങ്ങളിലെ കച്ചവട സ്ഥാപനങ്ങള്‍, കോക്കുന്ന് പള്ളി, മഞ്ഞിക്കാട് പൂതംകുറ്റി ജംഗ്ഷനുകളിലെ കച്ചവട സ്ഥാപനങ്ങളിലും ഓട്ടോസ്റ്റാന്റുകളിലും സ്ഥാനാര്‍ത്ഥി വോട്ട് അഭ്യര്‍ത്ഥിച്ചു. ബിജെപി മുക്കന്നൂര്‍ പഞ്ചായത്ത് കമ്മറ്റി പ്രസിഡന്റ് എം. ആര്‍. ദിനേശന്‍, ശ്രീരഞ്‌നന്‍, യൂത്ത് ഫ്രണ്ട് സംസ്ഥാന സെകട്ടറി ലിജോയ് പോള്‍, ആനന്ദന്‍ ആഴകം, നിലകണ്ഠന്‍, ബിജു തുടങ്ങിയ നേതാക്കള്‍ സ്ഥാനാര്‍ത്ഥിക്കൊപ്പം ഉണ്ടായിരുന്നു.
