ഇടുക്കി: ഫോണ് തകരാര്മൂലം ഇടുക്കി ഫയര്ഫോഴ്സ് വലയുന്നു. ഇതോടൊപ്പം ചെറുതോണിയിലും പരിസര പ്രദേശങ്ങളിലും നിന്ന് 101 ല് വിളിച്ചാല് കിട്ടുന്നത് തൊടുപുഴയിലും കട്ടപ്പനയിലുമാണെന്നതാണ് സത്യം. ഇവിടങ്ങളിലെ ഉദ്യോഗസ്ഥര് അപകട വിവരമറിയിക്കുന്നതിനായി ഇടുക്കി ഫയര്ഫോഴ്സിലേക്ക് വിളിക്കുമ്പോള് ഫോണ് തകരാറുമൂലം മിക്ക സമയങ്ങളിലും കോള് കിട്ടാറില്ല. തുടര്ന്ന് ഉദ്യോഗസ്ഥര് ഇടുക്കി സ്റ്റേഷനിലെ ജീവനക്കാരുടെ മൊബൈല് നമ്പറിലേക്ക് വിളിച്ചാണ് അപകട വിവരം അറിയിക്കുന്നത്. കഞ്ഞിക്കുഴി മേഖലയില് നിന്നും 101ല് വിളിക്കുമ്പോള് എറണാകുളത്തെ വിവിധ ഫയര്സ്റ്റേഷനുകളിലാണ് കിട്ടുന്നത്. ഇവിടെ നിന്നും സ്ഥലം മനസ്സിലാക്കി ഉദ്യോഗസ്ഥര് വിവരമറിയുക്കുമ്പോള് 10 മിനിറ്റിലധികം കഴിയും. ഇത് പതിവായതോടെ ഇടുക്കി ഫയര്ഫോഴ്സിന്റെ പ്രവര്ത്തനം അവതാളത്തിലായിരിക്കുകയാണ്. ഇന്നലെ അമല് ജ്യോതി സ്കൂളിന് സമീപം തീ പിടിച്ച വിവരം അറിയാന് താമസിച്ചത് ഇതിനുദാഹരണമാണ്. ഫോണ് വിളിച്ചപ്പോള് തൊടുപുഴ ഫയര്ഫോഴ്സിനാണ് കിട്ടിയത്. വിവരം പറയുന്നതിനായി ഇവിടെ നിന്നും നേരിട്ട് ഉദ്യോഗസ്ഥരെ വിളിക്കുകയായിരുന്നു. കഴിഞ്ഞ ദിവസം ഇടുക്കി കുറവന് മലയില് തീപിടിച്ച ദിവസവും ഫോണ് തകരാറിലായത് ഫയര്ഫോഴ്സിനെ വലച്ചിരുന്നു. നിലവില് കരിമണ്ണൂര് എക്സ്ചേഞ്ചിന് കീഴിലാണ് ഇടുക്കി ഫയര്ഫോഴ്സിലെ 04862 236100 എന്ന നമ്പര്. നിരവധി തവണ ഈ നമ്പര് ഇടുക്കിക്ക് സമീപത്തുള്ള വാഴത്തോപ്പ്, പൈനാവ് സബ് ഡിവിഷനിലേക്ക് മാറ്റി തരണമെന്ന് ആവശ്യപ്പെട്ട് ഉദ്യോഗസ്ഥര് അപേക്ഷ സമര്പ്പിച്ചെങ്കിലും കരിമണ്ണൂര് എക്സ്ചേഞ്ച് അധികൃതര് ഇത് നിരസിക്കുക്കയായിരുന്നു. കോമണ് നമ്പറായ 101 അനുവദിക്കണമെന്ന ആവശ്യവും ഇതുവരെ നടപ്പായിട്ടില്ല. ഇതോടെ ഇനി എന്ത് എന്നറിയാതെ കുഴങ്ങുകയാണ് ഫയര്ഫോഴ്സ് ജീവനക്കാര്. ഫയര്ഫോഴ്സിന്റെ ഓരോ സെക്കന്റും വിലപിടിച്ചതാണെന്ന് ടെലഫോണ് ഉദ്യോഗസ്ഥര് തിരിച്ചറിയുമെന്നാണ് ഇടുക്കിയിലെ ജീവനക്കാരുടെ പ്രതീക്ഷ.
ഫോണ് തകരാര്: ഇടുക്കി ഫയര്ഫോഴ്സ് കുഴയുന്നു
ബന്ധപ്പെട്ട വാര്ത്തകള്
പുതിയ വാര്ത്തകള്
ജന്മഭൂമി ഓണ്ലൈന്© Mathruka Pracharanalayam Limited.
Tech-enabled by Ananthapuri Technologies.