തുറവൂര്: താലൂക്ക് ആസ്ഥാനമാകാനുള്ള തുറവൂരിന്റെ കാത്തിരിപ്പ് നീളുന്നു. കാലമേറെയായി വികസനസ്വപ്നങ്ങള് നെഞ്ചേറ്റി കാത്തിരിക്കുകയാണ് തുറവൂര് കവല. പമ്പാ പാതയുള്പ്പടെയുള്ളവ വന്നതോടെ ഇവിടം കേന്ദ്രമാക്കി താലൂക്ക് ആസ്ഥാനം, ബസ്സ്റ്റാന്ഡ്, മിനി സിവില് സ്റ്റേഷന് തുടങ്ങിയവ സ്ഥാപിക്കണമെന്ന ആവശ്യം ഉയര്ന്നിരുന്നു.
നിലവില് ചേര്ത്തല അസ്ഥാനമായുള്ള താലൂക്കിന്റെ വടക്കും പടിഞ്ഞാറും, വടക്കുകിഴക്കും മേഖലകളിലുള്ളവര്ക്കു സര്ക്കാരുമായി ബന്ധപ്പെട്ട എല്ലാ ആവശ്യങ്ങള്ക്കും കിലോമീറ്ററുകള് താണ്ടി ചേര്ത്തലയിലെത്തണം. വടക്കേയറ്റത്തെ അരൂര്, എഴുപുന്ന പഞ്ചായത്തിലുള്ളവര്ക്കും വടക്കുകിഴക്കന് പ്രദേശമായ പെരുമ്പളം, പാണാവള്ളി തൈക്കാട്ടുശേരി പഞ്ചായത്തുകളിലുള്ളവര്ക്കും സൗകര്യപ്രദമായി എത്തിച്ചേരാന് കഴിയുമെന്നതും മേഖലയുടെ ഏകദേശം മധ്യഭാഗത്തു സ്ഥിതിചെയ്യുന്ന പ്രധാന കേന്ദ്രമെന്ന നിലയിലും താലൂക്കാസ്ഥാനമാക്കി വികസിപ്പിക്കാന് അനുയോജ്യമായ സ്ഥലമാണിതെന്ന അഭിപ്രായം ജനങ്ങള്ക്കിടയില് ശക്തമായിട്ടുണ്ട്.
തുറവൂരിനെ താലൂക്കാസ്ഥാനമാക്കി വികസിപ്പിക്കുന്നതിനൊപ്പം മിനിസിവില് സ്റ്റേഷനും സ്ഥാപിച്ചാല് പട്ടണക്കാട്, പാട്ടുകുളങ്ങര, കുത്തിയതോട്, അരൂര് തുടങ്ങി വിവിധയിടങ്ങളിലായി ചിതറിക്കിടക്കുന്ന സര്ക്കാര് അര്ദ്ധ സര്ക്കാര് സ്ഥാപനങ്ങളെയെല്ലാം ഒരേ കുടക്കീഴില് കൊണ്ടുവരാനും ഒരേ കാര്യത്തിനു പല സ്ഥലങ്ങളിലുള്ള പല ഓഫീസുകളില് കയറിയിറങ്ങേണ്ടിവരുന്നതു മൂലം പൊതുജനങ്ങള്ക്കുണ്ടാകുന്ന ദുരിതങ്ങള്ക്കും പരിഹാരമാകും.
