കോഴിക്കോട്: നിയമസഭാ തെരഞ്ഞെടുപ്പ് പ്രചാരണത്തിന്റെ ഭാഗമായി നോട്ടീസുകള്, പോസ്റ്ററുകള്, ലഘുലേഖകള് തുടങ്ങിയവ അച്ചടിക്കുന്നതുമായി ബന്ധപ്പെട്ട നിയമങ്ങള് പ്രസ് ഉടമകളും രാഷ്ട്രീയ പാര്ട്ടികളും കര്ശനമായി പാലിക്കണമെന്ന് ജില്ലാ തിരഞ്ഞെടുപ്പ് ഉദ്യോഗസ്ഥന് കൂടിയായ ജില്ലാ കലക്ടര് ഉത്തരവിട്ടു.
അച്ചടിക്കുമ്പോഴും പകര്പ്പുകള് എടുക്കുമ്പോഴും പ്രസ്സിന്റെ പേര്, പ്രസാധകന്റെ പേരും വിലാസവും, അച്ചടിക്കുന്ന കോപ്പികളുടെ എണ്ണം, പ്രിന്റിംഗ് ചെലവ് എന്നിവ മാറ്ററുകള്ക്കൊപ്പം പ്രസിദ്ധീകരിക്കണം. അച്ചടിക്കുന്നയാള് പ്രസാധകന്റെ പക്കല് നിന്ന് തന്നെ നേരിട്ടറിയാമെന്ന് രണ്ടുപേര് സാക്ഷ്യപ്പെടുത്തിയ പ്രഖ്യാപനത്തിന്റെ രണ്ട് പ്രതികള് വാങ്ങിയിരിക്കണം. അച്ചടി രേഖകയുടെ നാലു പകര്പ്പുകള്, അച്ചടിക്കാനെത്തുന്ന സ്ഥാനാര്ഥിയെയോ പ്രതിനിധിയെയോ പ്രസാധകന് നേരിട്ടറിയാമെന്നു കാണിക്കുന്ന രണ്ട് സാക്ഷികള് ഒപ്പുവച്ച സത്യവാങ്മൂലം എന്നിവ പ്രിന്റ് ചെയ്ത് മൂന്ന് ദിവസത്തിനകം നിശ്ചിത ഫോറത്തില് ജില്ലാ കലക്ടര്ക്ക് സമര്പ്പിക്കണം. ഇതിനുള്ള ഫോറങ്ങള് തെരഞ്ഞെടുപ്പ് വിഭാഗം എക്സ്പെന്റീച്ചര് സെല്ലില് ലഭിക്കും. വീഴ്ചവരുത്തുന്ന പ്രസ്സുകള്ക്കും സ്ഥാനാര്ഥികള്ക്കുമെതിരേ ശക്തമായ നടപടി സ്വീകരിക്കുമെന്നും ജില്ലാ കലക്ടര് അറിയിച്ചു.
