ആലപ്പുഴ: അംഗീകാരം നഷ്ടപ്പെട്ട ആലപ്പുഴ ഗവണ്മെന്റ് ദന്തല് കോളേജില് വിദ്യാര്ത്ഥികള് പഠനം തുടരുന്നത് ആശങ്കയോടെ. നൂറോളം വിദ്യാര്ത്ഥികളാണ് ഇപ്പോള് ഇവിടെ പഠനം നടത്തുന്നത്. ആവശ്യത്തിന് അടിസ്ഥാന സൗകര്യമോ വിദ്യാര്ത്ഥികള്ക്കിരിക്കാനുളള കസേരകളോ മതിയായ അധ്യാപകരോ ഇല്ലാതെ 2014ല് ആണ് സര്ക്കാര് വണ്ടാനത്ത് ദന്തല്കോളേജിന്റെ പ്രവര്ത്തനങ്ങള്ക്ക് തുടക്കം കുറിച്ചത്.
പ്രതിവര്ഷം 50 വിദ്യാര്ത്ഥികള്ക്ക് വീതമാണ് പ്രവേശനമെങ്കിലും ആദ്യവര്ഷം 45 ഉം അടുത്തവര്ഷം 48 ഉം വിദ്യാര്ത്ഥികള് പ്രവേശനം നേടി. എന്ട്രന്സ് പരീക്ഷയെഴുതി ഉന്നത മാര്ക്ക് നേടിയതിന്റെ അടിസ്ഥാനത്തിലാണ് ഓരോരുത്തര്ക്കും ഇവിടെ പ്രവേശനം നേടാനായത്.
എന്നാല് സ്വന്തമായി കെട്ടിടമോ മറ്റ് അടിസ്ഥാന സൗകര്യങ്ങളോ ഇല്ലാത്ത കോളേജില് ആവശ്യത്തിന് അധ്യാപകരെ നിയമിക്കണമെന്ന ഇന്ത്യന് ദന്തല് കൗണ്സിലിന്റെ നിര്ദ്ദേശം സര്ക്കാര് ചെവിക്കൊണ്ടില്ല. പുതുതായി കോളേജ് പ്രവര്ത്തനം ആരംഭിച്ച് ഒരു വര്ഷം തികയും മുന്പേ അംഗീകാരം റദ്ദുചെയ്യുണമെന്ന് കാട്ടി ഇന്ത്യന് ദന്തല് കൗണ്സില് കേന്ദ്രസര്ക്കാരിന് ശുപാര്ശ കൈമാറി.
തുടര്ന്ന് അവശ്യം വേണ്ട യന്ത്രോപകരണങ്ങളും കസേരകളും വാങ്ങി പ്രവര്ത്തനം തുടരുന്നതിനിടെ അടുത്ത അധ്യയന വര്ഷം വിദ്യാര്ത്ഥികളെ പ്രവേശിപ്പിക്കാന് പാടില്ലെന്ന നിര്ദ്ദേശമാണ് ദന്തല് കൗണ്സില് നല്കിയത്. പിന്നാക്ക വിഭാഗത്തിലെ കുട്ടികള്ക്കെന്ന പേരില് പാരാമെഡിക്കല് ഇന്സ്റ്റിറ്റ്യൂട്ടിനായി പണികഴിപ്പിച്ച കെട്ടിടത്തിലാണ് ദന്തല് കോളേജ് തുടങ്ങിയത്.
ഉടന് ദന്തല് കോളേജിനായി കെട്ടിടം നിര്മ്മിച്ച് അതിലേക്ക് പ്രവര്ത്തനം മാറ്റുമെന്നും നിലവിലുളള കെട്ടിടം പാരാമെഡിക്കല് ഇന്സ്റ്റിറ്റ്യൂട്ടിനായി ഉടന് വിട്ടുനല്കുമെന്നുമായിരുന്നു വാഗ്ദാനം. ഇതിന്റെ ഭാഗമായി മെഡിക്കല് കോളേജ് ഹോസ്റ്റലിന് സമീപം 5 ഏക്കര് സ്ഥലം ഏറ്റെടുത്തെങ്കിലും കെട്ടിടനിര്മ്മാണം എങ്ങുമെത്തിയില്ല. കെട്ടിട സൗകര്യങ്ങളുടെ അപര്യാപ്തയ്ക്ക് പുറമേ ആവശ്യമായ അധ്യാപകരുടെ തസ്തിക സൃഷ്ടിച്ച് നിയമനം നടത്തുന്നതിനും ആരോഗ്യവകുപ്പ് ശ്രമിച്ചില്ല.
ഇതിനിടെ പുതിയ കോളേജ് കെട്ടിടം നിര്മ്മിച്ച് ആവശ്യത്തിന് അടിസ്ഥാന സൗകര്യങ്ങള് ഒരുക്കാമെന്നും ഉറപ്പ് നല്കി കോടതിയെ സമീപിച്ചതിനെ തുടര്ന്ന് ഇപ്പോള് അംഗീകാരം ലഭിച്ചിട്ടുണ്ട്. എന്നാല് കെട്ടിട നിര്മ്മാണം ഇഴഞ്ഞുനീങ്ങുന്നതും, പുതിയ അധ്യാപക- അനധ്യാപക തസ്തിക രൂപീകരിച്ച് നിയമനം നടത്താന് ആവശ്യമായ നടപടി സര്ക്കാര് കൈക്കൊളളാത്തതും ഭീതിയോടെയാണ് വിദ്യാര്ത്ഥികള് കാണുന്നത്.
