ഇരിട്ടി: നാടിന്റെ സമൂലപരിവര്‍ത്തനത്തിനും സമാജത്തിന്റെ മുന്നോട്ടുള്ള ഒഴുക്കിനും വേണ്ടി നടത്തിയ പ്രവര്‍ത്തനത്തില്‍ ജീവിതം ബലികഴിക്കേണ്ടി വന്ന അപൂര്‍വ വ്യക്തിത്വത്തിനുടമ യായിരുന്നു അശിനികുമാര്‍ എന്ന് എബിവിപി സംസ്ഥാന സംഘടനാ സിക്രട്ടറി വി.മഹേഷ്‌ പറഞ്ഞു. പുന്നാട്‌ അശ്വിനികുമാറിന്റെ പതിനൊന്നാം ബലിദാന ദിനാചരണത്തിന്റെ ഭാഗമായി മീത്തലെപുന്നാട്‌ അശ്വിനി സ്‌മൃതിമണ്ഡപത്തില്‍ നടന്ന പുഷ്‌പാര്‍ച്ചനക്ക്‌ ശേഷം അശ്വിനി അനുസ്‌മരണച്ചടങ്ങില്‍ പ്രഭാഷണം നടത്തുകയായിരുന്നു അദ്ദേഹം.
സമൂഹത്തിനു വേണ്ടി തനിക്കെന്ത്‌ ചെയ്യാന്‍ കഴിയുമെന്ന്‌ അദ്ദേഹം നിരന്തരം ചിന്തിച്ചു. സാമൂഹിക മാറ്റത്തിനും സമൂഹത്തില്‍ ധാര്‍മ്മികത വളര്‍ത്തുന്നതിനും അതിനായി ഓരോ വ്യക്തിയിലും ആത്മവിശ്വാസം വളര്‍ത്തുന്നതിനും അദ്ദേഹം പരിശ്രമിച്ചു. മരണം സുനിശ്ചിതമാണെന്നറിഞ്ഞിട്ടും യുദ്ധക്കളത്തില്‍ അടരാടി മരിച്ച അഭിമന്യുവിനെപ്പോലെ അശ്വിനിയുടെ ബാലിദാനവും സമൂഹത്തിന്‌ ഊര്‍ജ്ജം പകരുന്നതാവണം. വ്യര്‍ത്ഥമാക്കാനുള്ളതല്ല, മറിച്ചു സമൂഹത്തിന്റെയും സമാജത്തിന്റെയും സമൂല പരിവര്‍ത്തനത്തിന്‌ ഊര്‍ജ്ജം പകരുന്നതാവണം അദ്ദേഹത്തിന്റെ ബലിദാനം.മഹേഷ്‌ പറഞ്ഞു. ചടങ്ങില്‍ ഇരിട്ടി താലൂക്ക്‌ സംഘചാലക്‌ കെ.എ.ദാമോദരന്‍ മാസ്റ്റര്‍ അദ്ധ്യക്ഷത വഹിച്ചു.
നേരത്തെ അശ്വിനി സ്‌മൃതി മണ്ഡപത്തില്‍ നടന്ന പുഷ്‌പാര്‍ചനയില്‍ ആര്‍എസ്‌എസ്‌ പ്രാന്തീയ കാര്യകാരി സദസ്യന്‍ വത്സന്‍ തില്ലങ്കേരി, വിഭാഗ്‌ പ്രചാരക്‌ ഗിരീഷ്‌ കുമാര്‍, ബിജെപി ജില്ലാ അദ്ധ്യക്ഷന്‍ അഡ്വ.സത്യപ്രകാശ്‌, ജനറല്‍ സിക്രട്ടറി എം.കെ.വിനോദ്‌ കുമാര്‍, സി. ബാലഗോപാലന്‍, സത്യന്‍ കൊമ്മേരി, കെ.ശിവശങ്കരന്‍, പി.രഘു, പി.വി.ദീപ, പി.എം.രവീന്ദ്രന്‍, സി.വി.രവീന്ദ്രന്‍, ശങ്കരന്‍ പുന്നാട്‌, കെ.രതീഷ്‌ മാസ്റ്റര്‍ തുടങ്ങി നിരവധി പേര്‍ പങ്കെടുത്തു.
