നാദാപുരം: പാറക്കടവില് വിദ്യാര്ത്ഥിക്കുനേരെ എന്ഡിഎഫുകാര് അക്രമം നടത്തിയ സംഭവത്തില് രണ്ടു പേര് അറസ്റ്റില്. ചെക്യാട് സ്വദേശികളായ കുനിയില് അന്സാര്(27), പിലാത്തോട്ടത്തില് നാസര് (32) എന്നിവരെയാണ് അറസ്റ്റ് ചെയ്തത്. വളയം എസ്ഐ പി.എസ്. പ്രശാന്തിന്റെ നേതൃത്വത്തിലാണ് പ്രതികളെ അറസ്റ്റ് ചെയ്തത്. കോടതിയില് ഹാജരാക്കിയ പ്രതികളെ റിമാന്റ് ചെയ്തു.
കല്ലാച്ചിയിലെ സ്വകാര്യ കോളേജ് വിദ്യാര്ത്ഥിയും ബിജെപി എടച്ചേരി പഞ്ചായത്ത് കമ്മിറ്റി മുന് പ്രസിഡണ്ട് സുരേഷ് ബാബുവിന്റെ മകനുമായ ഇരിങ്ങണ്ണൂര് മുത്തങ്ങേരി ശ്രീസാഗറിനെയാണ് എന്ഡിഎഫ് ഗുണ്ടകള് ഞായറാഴ്ച ക്രൂരമായി അക്രമിച്ചത്. ഗുരുതരമായി പരിക്കേറ്റ വിദ്യാര്ത്ഥി വടകരയിലെ താലൂക്ക് ആശുപത്രിയില് ചികിത്സയിലാണ്.
പാറക്കടവ് ചെക്യാട് സഹപാഠിയായ പെണ്കുട്ടിയുടെ കല്യാണത്തിന് എത്തിയതായിരുന്നു ശ്രീസാഗറും സുഹൃത്തുക്കളും. കല്യാണം കഴിഞ്ഞ് വീട്ടിലേക്ക് പോകാന് വാഹനം കിട്ടാതെ നിന്ന ഇതേ കോളേജിലെ വളയം സ്വദേശിയായ പെണ്കുട്ടി തന്നെ പാറക്കടവ് ടൗണില് ഇറക്കിത്തരാന് ആവശ്യപ്പെട്ടതിനെ തുടര്ന്ന് വീട്ടുടമ നല്കിയ ബൈക്കില് പെണ്കുട്ടിയെ ഇറക്കി തിരിച്ചു വരുമ്പോഴായിരുന്നു ശ്രീസാഗറിനുനേരെ അക്രമം ഉണ്ടായത്. മാരകായുധങ്ങളുമായി എത്തിയ അന്പതോളം പേരടങ്ങുന്ന സംഘം ബൈക്ക് തടഞ്ഞുവെച്ച് മര്ദ്ദിക്കുകയായിരുന്നു. തുടര്ന്നു പാറക്കടവ് അങ്ങാടിയില് ഭീകരാന്തരീക്ഷം സൃഷ്ടിച്ച സംഘം വളയത്തു നിന്ന് പോലീസ് എത്തിയതോടെയാണ് പിരിഞ്ഞുപോയത്. ടൗണില് ആളുകള് നോക്കി നില്ക്കെയായിരുന്നു ആക്രമണം. മര്ദ്ദിക്കുന്നത് കണ്ട് തടയാന് എത്തിയ നാട്ടുകാര്ക്കും അക്രമികളുടെ മര്ദനമേറ്റു.
