കണ്ണൂര്‍: ഭൗതിക സാഹചര്യങ്ങള്‍ വികസിക്കുന്നതോടൊപ്പം ജനങ്ങളുടെ സംതൃപ്തിയും അംഗീകാരവും കൂടിയാവുമ്പോഴാണ് വികസനം അര്‍ത്ഥപൂര്‍ണമാകുന്നതെന്ന് കണ്ണൂര്‍ സര്‍വകലാശാല വൈസ് ചാന്‍സലര്‍ ഡോ.ഖാദര്‍ മാങ്ങാട് അഭിപ്രായപ്പെട്ടു. ഇന്‍ഫര്‍മേഷന്‍ ആന്റ് പബ്ലിക് റിലേഷന്‍സ് വകുപ്പ് യുവജനക്ഷേമബോര്‍ഡ്, സര്‍വകലാശാല സെന്റര്‍ ഫോര്‍ മാനേജ്‌മെന്റ് സ്റ്റഡീസ് എന്നിവയുടെ സഹകരണത്തോടെ വികസനവും യുവജനങ്ങളും എന്ന വിഷയത്തില്‍ സംഘടിപ്പിച്ച സംവാദം സര്‍വകലാശാല സെന്‍ട്രല്‍ ലൈബ്രറിയിലെ ചെറുശ്ശേരി ഓഡിറ്റോറിയത്തില്‍ ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.
വികസനത്തിന്റെ യഥാര്‍ത്ഥ ഗുണഭോക്താക്കള്‍ യുവതലമുറയാണെന്ന് ചടങ്ങില്‍ അധ്യക്ഷത വഹിച്ച ജില്ലാ ഇന്‍ഫര്‍മേഷന്‍ ഓഫീസര്‍ ഇ.വി.സുഗതന്‍ പറഞ്ഞു. ഉപരിപഠനത്തിനും ജോലിക്കുമായി സംസ്ഥാനത്തിന് പുറത്തേക്കു നോക്കിയിരിക്കുന്ന അവസ്ഥ മാറുകയാണെന്നും അവസരങ്ങളുടെ ജാലകങ്ങള്‍ കേരളത്തില്‍ തന്നെ തുറക്കുകയാണെന്നും അദ്ദേഹം പറഞ്ഞു. യുജനക്ഷേമബോര്‍ഡ് ജില്ലാ കോ-ഓര്‍ഡിനേറ്റര്‍ അര്‍ജുന്‍ പാലയാട് സ്വാഗതവും എംബിഎ വിഭാഗം അസി. ഡയരക്ടര്‍ കോമള്‍ ആനന്ദ് നന്ദിയും പറഞ്ഞു.
