പാനൂര്‍ നഗരസഭയുടെ കന്നിബജറ്റില്‍ പ്രതീക്ഷയും ആശങ്കയും

പാനൂര്‍: പാനൂര്‍ നഗരസഭയുടെ കന്നിബജറ്റില്‍ പ്രതീക്ഷയും, ആശങ്കയും. നഗരസഭയുടെ പ്രഥമ ബജറ്റില്‍ കാര്‍ഷിക മേഖലയെ അവഗണിച്ചും, അടിസ്ഥാന സൗകര്യ വികസനത്തിനു നേരെ മുഖംതിരിച്ചുമുളള ബജറ്റെന്ന് പ്രതിപക്ഷാരോപണം. 16,56,82,867 രൂപ വരവും, 15,24,96,000 രൂപ ചിലവും പ്രതീക്ഷിക്കുന്ന 2016-17ലെ ബജറ്റ് വൈസ് ചെയര്‍മാന്‍ എം.കെ.പത്മനാഭന്‍ അവതരിപ്പിച്ചു. ടൗണ്‍ഹാള്‍ വ്യാപാരസമുച്ചയത്തിന് ഒരുകോടി നീക്കിവെച്ചു. നഗരസഭാ കാര്യാലയ നിര്‍മ്മാണത്തിന് 58 ലക്ഷം രൂപയും റിങ് റോഡുകള്‍ പണിയാനും ബൈപാസ് നവീകരണത്തിനും 50 ലക്ഷവും അനുവദിച്ചിട്ടുണ്ട്. മാലിന്യ സംസ്‌കരണ പ്ലാന്റിന് 40 ലക്ഷവും, പെരിങ്ങത്തൂരില്‍ മിനിബസ്റ്റാന്‍ഡ് പണിയാന്‍ 10 ലക്ഷവും നീക്കി വെച്ചു. സര്‍ക്കാര്‍ വിദ്യാലയത്തിനായി 10ലക്ഷം, മൂന്ന് ഹൈമാസ്റ്റ് ലൈറ്റിനായി 6 ലക്ഷം, ബഡ്‌സ് സ്‌ക്കൂളിന് 2 ലക്ഷം, വനിതാ ശിശുക്ഷേമം 12 ലക്ഷം, സേവാഗ്രാം പദ്ധതിയ്‌ക്ക് 20 ലക്ഷം, അയ്യങ്കാളി തൊഴിലുറപ്പ് പദ്ധതിയ്‌ക്ക് 50 ലക്ഷം തുടങ്ങി 1,31,86,867രൂപ മിച്ചം വരുന്ന ബജറ്റാണ് പ്രഖ്യാപിക്കപ്പെട്ടത്.എന്നാല്‍ കാര്‍ഷിക മേഖലയായ പാനൂര്‍, പെരിങ്ങളം, കരിയാട് പഞ്ചായത്തുകളെ ഉള്‍പ്പെടുത്തി രൂപീകരിച്ച നഗരസഭയില്‍ കൃഷിമേഖലയില്‍ അനുവദിച്ച ഫണ്ടുകള്‍ പര്യാപ്തമല്ലെന്ന് പ്രതിപക്ഷ നേതാവ് കെ.കെ.സുധീര്‍കുമാര്‍ പറഞ്ഞു. തെങ്ങിന് ജൈവവളത്തിനായി അനുവദിച്ചത് 2 ലക്ഷവും, വിഷരഹിത വിള, കൃഷി എന്നിവക്ക് 3 ലക്ഷവുമാണ് നീക്കി വെച്ചത്. ഇതു പ്രതിഷേധാര്‍ഹമാണ്. തൊഴിലുറപ്പ് പദ്ധതിയില്‍ പണിയെടുത്ത് 1 കോടി 33 ലക്ഷം രൂപ കഴിഞ്ഞ വര്‍ഷം കൂലിയിനത്തില്‍ ലഭിച്ച മേഖലയില്‍ അയ്യങ്കാളി തൊഴിലുറപ്പ് പദ്ധതിയ്‌ക്ക് 50 ലക്ഷമാണ് മാറ്റിവെച്ചത്. കുടുംബശ്രീ, ആശ്രയപദ്ധതികള്‍ക്ക് വേണ്ടത്ര തുക വകയിരുത്തിയില്ലെന്നും, അടിസ്ഥാന ജനവിഭാഗത്തെ തഴഞ്ഞുമാണ് ബജറ്റവതരണമെന്നും പ്രതിപക്ഷനേതാവ് കുറ്റപ്പെടുത്തി. ഗതാഗതകുരുക്കില്‍ വീര്‍പ്പുമുട്ടുന്ന പാനൂരില്‍ റോഡുവികസനത്തിന് ശുഷ്‌കമായ തുക നീക്കിവെച്ചത് പ്രതിഷേധാര്‍ഹമാണെന്ന് ബിജെപി കൗണ്‍സിലര്‍ കെ.കെ.ചന്ദ്രന്‍ ആരോപിച്ചു. റോഡ് വികസനത്തിന് ലഭ്യമായ ഫണ്ടുകള്‍ കേന്ദ്രസര്‍ക്കാര്‍ നല്‍കി വരുന്നത് ശ്രദ്ധയില്‍പ്പെടുത്തിയാണ് കെ.കെ.ചന്ദ്രന്‍ വിമര്‍ശനമുന്നയിച്ചത്. അന്യം നിന്നുകൊണ്ടിരിക്കുന്ന നെയ്‌ത്ത് മേഖലയെ പ്രോത്സാഹിപ്പിക്കാന്‍ തുക വകയിരുത്താതും, കാര്‍ഷികമേഖലയ്‌ക്ക് നാമമാത്രമായ തുക അനുവദിച്ചതും നീതികരിക്കാനാകാത്തതാണ്. ബജറ്റ് ജനോപകാരപ്രദമല്ലെന്നും കെ.കെ.ചന്ദ്രന്‍ കുറ്റപ്പെടുത്തി.