സ്വന്തം ലേഖകന്‍
കണ്ണൂര്‍: കേന്ദ്ര റെയില്‍വേമന്ത്രി സുരേഷ് പ്രഭു ഇന്നലെ ലോക്‌സഭയില്‍ അവതരിപ്പിച്ച റെയില്‍വേ ബജറ്റില്‍ കണ്ണൂര്‍-മട്ടന്നൂര്‍ റെയില്‍വേ ലൈനിനു വേണ്ടി 400 കോടി നീക്കിവെച്ചതോടെ കണ്ണൂരിലെ ജനങ്ങളുടെ ചിരകാല ആവശ്യങ്ങളില്‍ ഒന്നുകൂടി യാഥാര്‍ത്ഥ്യമാകുന്നു. ഏറെ നാളത്തെ കാത്തിരിപ്പിനുശേഷം കണ്ണൂര്‍ വിമാനത്താവളം മട്ടന്നൂര്‍ മൂര്‍ഖന്‍പറമ്പില്‍ യാഥാര്‍ത്ഥ്യമായി കൊണ്ടിരിക്കെ നിര്‍ദ്ദിഷ്ട വിമാനത്താവള പ്രദേശം ഉള്‍പ്പെടുന്ന മട്ടന്നൂരിലേക്ക് റെയില്‍വേ ലൈന്‍ കൂടി വന്നാല്‍ കണ്ണൂരില്‍ വന്‍ വികസന പന്ഥാവ് തന്നെ തുറക്കപ്പെടും. മാത്രമല്ല, കണ്ണൂരിലെ വ്യാവസായിക-വാണിജ്യ മേഖലയില്‍ വന്‍ കുതിച്ചുച്ചാട്ടത്തിനു തന്നെ റെയില്‍വേ ലൈന്‍ വഴിയൊരുക്കും. കഴിഞ്ഞ 10 വര്‍ഷക്കാലം കേന്ദ്ര ഭരണം നടത്തിയ യുപിഎയിലെ മുഖ്യ സഖ്യകക്ഷിയായ കോണ്‍ഗ്രസ് ഭരിക്കുന്ന കേരളത്തോടും കണ്ണൂരിനോടും കഴിഞ്ഞ കേന്ദ്രസര്‍ക്കാര്‍ തികഞ്ഞ അവഗണനയാണ് കാട്ടിയിരുന്നത്. റെയില്‍വേ ബജറ്റുകളില്‍ കേരളത്തെ പൂര്‍ണമായും അവഗണിച്ച യുപിഎ സര്‍ക്കാറിന് മുന്നില്‍ നിര്‍ദ്ദിഷ്ട കണ്ണൂര്‍ വിമാനത്താവളത്തിലേക്ക് റെയില്‍വേ ലൈനിനായി കേരളത്തിലെ കോണ്‍ഗ്രസ് നേതാക്കളും കണ്ണൂരിനെ പ്രതിനിധീകരിച്ച മന്ത്രിമാരും എംപിമാരും ഒന്നും തന്നെ ചെയ്തിരുന്നില്ല. എന്നാല്‍ വിമാനത്താവളം യാഥാര്‍ത്ഥ്യമാകുന്നതോടെ മട്ടന്നൂര്‍-കണ്ണൂര്‍ റെയില്‍വേ ലൈനിന്റെ ആവശ്യകത ബിജെപി ജില്ലാ നേതൃത്വവും ലോകസഭയിലെ ആംഗ്ലോ ഇന്ത്യന്‍ പ്രതിനിധി തലശ്ശേരി സ്വദേശിയായ റിച്ചാര്‍ഡ് ഹെ എംപിയും റെയില്‍വേ മന്ത്രിയെയും ഉദ്യോഗസ്ഥരെയും ബോധ്യപ്പെടുത്തിയതിന്റെ അടിസ്ഥാനത്തിലാണ് ഇന്നലെ ബജറ്റില്‍ പുതിയ പാതക്കായി 400 കോടി രൂപ മാറ്റിവെച്ചിരിക്കുന്നത്. റെയില്‍വേ ലൈന്‍ യാഥാര്‍ത്ഥ്യമാകുന്നതോടെ കണ്ണൂര്‍ ജില്ലയുടെ വിവിധ ഭാഗങ്ങളില്‍ വന്‍ വികസന സാധ്യതകള്‍ക്കാണ് വഴി തുറക്കുന്നത്. അധികാരത്തിലെത്തി രണ്ടു വര്‍ഷത്തിനുള്ളില്‍ കണ്ണൂരിന് വേണ്ടി നിരവധി കേന്ദ്ര പദ്ധതികള്‍ പ്രഖ്യാപിച്ച നരേന്ദ്രമോദിയുടെ നേതൃത്വത്തിലുള്ള ബിജെപി സര്‍ക്കാറിന്റെ കണ്ണൂരിനുളള മറ്റൊരു ബൃഹത് പദ്ധതിയായി കണ്ണൂര്‍-മട്ടന്നൂര്‍ റെയില്‍വേ ലൈന്‍ പ്രഖ്യാപനം. കണ്ണൂരിലെ വ്യാവസായിക വാണിജ്യ മേഖകളൊന്നാകെ റെയില്‍വേ ബജറ്റിലെ മട്ടന്നൂര്‍-കണ്ണൂര്‍ റെയില്‍വേ ലൈന്‍ പ്രഖ്യാപനത്തെ സ്വാഗതം ചെയ്തുകൊണ്ട് രംഗത്തെത്തിയിട്ടുണ്ട്. കണ്ണൂരില്‍ നിന്ന് സംസ്ഥാന നിയമസഭയിലേക്കും പാര്‍ലമെന്റിലേക്കും ഒരൊറ്റ ജനപ്രതിനിധി പോലും ഇല്ലാതിരുന്നിട്ടും റെയില്‍വേ ലൈന്‍ ഉള്‍പ്പെടെ അനുവദിച്ച് കണ്ണൂരിന്റെ നാനാവിധ വികസനത്തിനായി കേന്ദ്ര ഭരണം കൊണ്ട് ചെയ്യാവുന്നതെല്ലാം ചെയ്യുന്ന ബിജെപി നേതൃത്വത്തിന്റെ പ്രവര്‍ത്തനങ്ങള്‍ ജനങ്ങള്‍ക്കിടയില്‍ മികച്ച പ്രതികരണങ്ങള്‍ക്ക് വഴിയൊരുക്കിയിട്ടുണ്ട്. ഇന്നലെ അവതരിപ്പിച്ച റെയില്‍വേ ബജറ്റില്‍ കോഴിക്കോട് -മംഗലാപുരം ഗേജ് മാറ്റത്തിന് 2 കോടി രൂപ മാററിവെച്ചതും ഉത്തര മലബാറിനും കണ്ണൂരിനും ആശ്വാസമായി
