കണ്ണൂര്‍: കേരള ക്ഷേത്രസംരക്ഷണ സമിതി സുവര്‍ണ്ണ ജയന്തി ആഘോഷത്തിന്റെ ഭാഗമായി മാതൃസമിതി സംസ്ഥാന അധ്യക്ഷ പ്രൊഫ.വി.ടി.രമ നയിക്കുന്ന സ്ത്രീ സ്വാഭിമാന്‍ യാത്രക്ക് ജില്ലയുടെ വിവിധ കേന്ദ്രങ്ങളില്‍ ഉജ്ജ്വല സ്വീകരണം. സ്ത്രീ സുരക്ഷ ഉയര്‍ത്തിക്കാട്ടി മാതൃസമിതി നടത്തിയ യാത്രക്ക് സ്വീകരണം നല്‍കാന്‍ നിരവധി പേരാണ് എത്തിയത്. സ്ത്രീസമൂഹം ഇന്ന് അഭിമുഖീകരിക്കുന്ന അടിസ്ഥാന പ്രശ്‌നങ്ങളാണ് ജാഥയില്‍ ചര്‍ച്ച ചെയ്യുന്നത്. ഇന്നലെ രാവിലെ തളിപ്പറമ്പില്‍ നിന്നാരംഭിച്ച യാത്ര വിവിധ കേന്ദ്രങ്ങളിലെ ആവേശോജ്ജ്വല സ്വീകരണത്തിന് ശേഷം വൈകുന്നേരം തലശ്ശേരിയില്‍ സമാപിച്ചു. ഇന്ന് രാവിലെ 10 മണിക്ക് ഇരിട്ടിയിലും തുടര്‍ന്ന് 11 മണിക്ക് കൊട്ടിയൂരിലെയും സ്വീകരണത്തിന് ശേഷം സ്വാഭിമാന്‍ യാത്ര വയനാട് ജില്ലയില്‍ പ്രവേശിക്കും.
കണ്ണൂരില്‍ നടന്ന സ്വീകരണ പരിപാടിയില്‍ എ.ദാമോദരന്‍ അധ്യക്ഷത വഹിച്ചു. സംസ്ഥാന സെക്രട്ടറി ശ്രീധര്‍ജി സംസാരിച്ചു. ക്ഷേത്രസംരക്ഷണ സമിതി സംസ്ഥാന സംഘടനാ സെക്രട്ടറി മോഹനന്‍, മാതൃസമിതി സംസ്ഥാന സെക്രട്ടറി ശാന്താ എസ്.പിള്ള, പ്രേമാനന്ദ ശിവഗിരി മഠം, എന്‍.ഭാസ്‌കരന്‍, അഡ്വ.എം.കെ.രഞ്ജിത്ത്, ഹരീഷ്ബാബു മക്രേരി, സി.ജെ.ഗോപാലകൃഷ്ണന്‍, ഗിരീഷ് ബാബു എന്നിവര്‍ പങ്കെടുത്തു. മാതൃസമിതി കണ്ണൂര്‍ താലൂക്ക് പ്രസിഡണ്ട് രൂപ ടീച്ചര്‍ സ്വാഗതവും താലൂക്ക് സെക്രട്ടറി പ്രജുല നന്ദിയും പറഞ്ഞു.
