കണ്ണൂര്: ജില്ലാ പഞ്ചായത്ത് നടപ്പിലാക്കുന്ന വിഷുവിന് വിഷരഹിത പച്ചക്കറി പദ്ധതിയുടെ ഭാഗമായുളള നടീല് ഉത്സവം ഇന്ന് പാപ്പിനിശ്ശേരി പഞ്ചായത്തിലെ പഴഞ്ചിറ താവയില് പ്രതിപക്ഷ ഉപനേതാവ് കോടിയേരി ബാലകൃഷ്ണന് ഉദ്ഘാടനം ചെയ്യും. രാവിലെ 8.30 ന് നടക്കുന്ന ചടങ്ങില് ജില്ലാ കലക്ടര് പി.ബാലകിരണ് മുഖ്യാതിഥിയായിരിക്കും. ജില്ലാ പഞ്ചായത്ത് വൈസ് പ്രസിഡണ്ട് പി.പി.ദിവ്യ അധ്യക്ഷത വഹിക്കും.
30 നകം എല്ലാ ബ്ലോക്കുകളിലും നടീല് ഉത്സവം നടത്തുമെന്ന് ജില്ലാ പഞ്ചായത്ത് വൈസ് പ്രസിഡണ്ട് പി.പി.ദിവ്യ പത്രസമ്മേളനത്തില് അറിയിച്ചു. 200 ഹെക്ടര് സ്ഥലത്താണ് കൃഷി നടത്തുക. ആവശ്യമായ വിത്തും തൈകളും ജില്ലാ പഞ്ചായത്ത് വിതരണം ചെയ്യും. കരിമ്പം, കാങ്കോല്, വേങ്ങാട്, പാലയാട് ഫാമുകളില് നിന്നായിരിക്കും ഇത് ലഭ്യമാക്കുക. സാങ്കേതിക സഹായങ്ങളും ജില്ലാ പഞ്ചായത്ത് നല്കും. ഇതിനായി കൃഷി വിദഗ്ധരടങ്ങിയ സംഘത്തെ നിയോഗിക്കും. വാട്സ് ആപ് വഴി കര്ഷകര്ക്ക് രോഗബാധയും മറ്റ് പ്രശ്നങ്ങളും സംബന്ധിച്ച് സംശയ നിവാരണം നടത്താനാവും. നിലമൊരുക്കല്, ജൈവ കീടനാശിനി, ജൈവവളം എന്നിവ ഗ്രാമ, ബ്ലോക്ക് പഞ്ചായത്തുകള് കര്ഷകര്ക്ക് നല്കും.
ഉല്പ്പന്നങ്ങള്ക്ക് വിപണി ഉറപ്പാക്കുന്നതിനായി ജില്ലാ കേന്ദ്രത്തില് വിപണന കേന്ദ്രവും ബ്ലോക്കുകളില് സ്റ്റാളുകളും ഒരുക്കും. ജൈവപച്ചക്കറിയാണെന്ന് ഉറപ്പുവരുത്താന് പഞ്ചായത്ത് തലത്തില് കൃഷി ഓഫീസറുടെ നേതൃത്വത്തില് പരിശോധനാ സംവിധാനം ഒരുക്കുമെന്നും അവര് പറഞ്ഞു. സ്റ്റാന്റിങ്ങ് കമ്മിറ്റി ചെയര്മാന്മാരായ വി.കെ.സുരേഷ് ബാബു, കെ.ശോഭ, സെക്രട്ടറി എം.കെ.ശ്രീജിത്, അംഗം ആര്.അജിത, സംഘാടക സമിതി കണ്വീനര് രമേശന് എന്നിവര് പത്രസമ്മേളനത്തില് പങ്കെടുത്തു.
