കോഴിക്കോട്: കാരശ്ശേരി സര്‍വീസ് സഹകരണ ബാങ്കിന്റെ പുവ്വാട്ട് പറമ്പ് ശാഖയുടെ മുമ്പില്‍ നടക്കുന്ന സത്യഗ്രഹത്തിനിടെ കല്ലേറും ലാത്തിച്ചാര്‍ജും. മാവൂര്‍ എസ്.ഐ അടക്കം നിരവധി പേര്‍ക്ക് പരിക്ക്. പോലീസ് ലാത്തിച്ചാര്‍ജ്ജില്‍ പ്രതിഷേധിച്ച് ഇന്ന് രാവിലെ ആറുമുതല്‍ വൈകിട്ട് ആറു വരെ പെരുവയല്‍ പഞ്ചായത്തില്‍ സര്‍വ്വകക്ഷി ഹര്‍ത്താലിനാഹ്വാനം ചെയ്തിട്ടുണ്ട്.
ഇന്നലെ വൈകിട്ട് നാലു മണിയോടെയാണ് സംഭവത്തിന്റെ തുടക്കം. സഹകരണ നിയമങ്ങള്‍ ലംഘിച്ചുകൊണ്ട് കാരശ്ശേരി സര്‍വീസ് സഹകരണ ബാങ്ക് ജില്ലയുടെ വിവിധ ഭാഗങ്ങളില്‍ ശാഖകള്‍ ആരംഭിക്കുന്നതിനെതിരെ സമരം നടന്നുവരികയായിരുന്നു. പൂവ്വാട്ടുപറമ്പില്‍ ഈയിടെ ആരംഭിച്ച ബാങ്ക് ശാഖയുടെ മുമ്പില്‍ ഒരു മാസമായി സമരം നടന്നുവരികയായിരുന്നു. ബാങ്ക് ശാഖയുടെ വഴി തടസ്സപ്പെടുത്തരുതെന്ന് കഴിഞ്ഞ ദിവസം ഹൈക്കോടതി ഉത്തരവിട്ടിരുന്നു. രാവിലെ ബാങ്കില്‍ ജോലിക്ക് പ്രവേശിച്ചവരെ സമരക്കാര്‍ പുറത്തിറങ്ങാന്‍ അനുവദിച്ചില്ല. വൈകിട്ട് ബാങ്കിന് നേരെ ശക്തമായ കല്ലേറും നടന്നു. മെഡിക്കല്‍ കോളജ് സി. ഐ. യുടെ നേതൃത്വത്തിലെത്തിയ പോലീസ് സംഘത്തിന് നേരേയും കല്ലേറുണ്ടായി. കല്ലേറില്‍ ബാങ്കിന് കേടുപാടുകള്‍ പറ്റി. സമരക്കാരും പോലീസും തമ്മില്‍ സംഘര്‍ഷമുണ്ടായി. സമരക്കാരെ പോലീസ് ലാത്തി വീശി ഓടിച്ചു. ലാത്തിച്ചാര്‍ജ്ജിലും കല്ലേറിലും വഴിയാത്രക്കാര്‍ക്കടക്കം നിരവധി പേര്‍ക്ക് പരിക്കേറ്റു. മാവൂര്‍ എസ്‌ഐ ശശിധരന്‍, സിവില്‍ പോലീസ് ഓഫീസര്‍ സജിത് കുമാര്‍, മെഡിക്കല്‍ കോളജ് പോലീസ് സ്റ്റേഷന്‍ എസ്‌ഐ മുഹമ്മദ്കുട്ടി, ബാങ്ക് പൂവ്വാട്ടുപറമ്പ് ശാഖാ മാനേജര്‍ നബീസ, കുന്നേരി ശ്യാം വഴിയാത്രക്കാരനായ കുന്ദമംഗലം ആരതി നിവാസ് മുരളീധരന്‍, പെരുമണ്ണ സഹകരണ ബാങ്ക് ഡയറക്ടര്‍ കോയിക്കല്‍ അനീഷ് എന്നിവരെ മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചു. സംഭവത്തെതുടര്‍ന്ന് പത്തോളം പേരെ പോലീസ് കസ്റ്റഡിയിലെടുത്തിട്ടുണ്ട്.
