കണ്ണൂര്: ഇടത്-വലത് ശക്തികള്ക്കിടയില് മൂന്നാമതൊരു ശക്തിയായി അതിശക്തമായി പ്രവര്ത്തിക്കാന് കേരളാ സ്റ്റേറ്റ് സര്വ്വീസ് പെന്ഷനേഴ്സ് സംഘിന് കഴിഞ്ഞിട്ടുണ്ടെന്ന് സംഘടനാ സംസ്ഥാന വൈസ് പ്രസിഡന്റ് രവീന്ദ്രനാഥ് ചേലേരി അഭിപ്രായപ്പെട്ടു. കേരളാ സ്റ്റേറ്റ് സര്വ്വീസ് പെന്ഷനേഴ്സ് സംഘ് ജില്ലാ കമ്മറ്റിയുടെ നേതൃത്വത്തില് തെക്കീബസാര് സര്വ്വമംഗള സേവാകേന്ദ്രത്തില് നടന്ന പെന്ഷന് ദിനാചരണം ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. വര്ഷങ്ങള്ക്ക് മുന്പ് എന്ജിഒ യൂണിയനും എന്ജിഒ അസോസിയേഷനും പ്രബലശക്തിയായി നിലനിന്നിരുന്ന കാലത്താണ് സര്ക്കാര് ജീവനക്കാരുടെയും അധ്യാപകരുടെയും സംഘടനയായ എന്ജിഒ സംഘ് രൂപപ്പെട്ടത്. പിന്നീട് ശക്തമായ പ്രവര്ത്തനങ്ങളിലൂടെ ശക്തിയാര്ജ്ജിക്കാന് എന്ജിഒ സംഘിന് കഴിഞ്ഞു. സര്വ്വീസ് ജീവനക്കാരുടെയും അധ്യാപകരുടെയും പെന്ഷന് സംഘടനയായി രൂപംകൊണ്ട പെന്ഷനേഴ്സ് സംഘ് കേരളത്തിലെ പെന്ഷന്കാരുടെ ശക്തമായ ഒരു സംഘടനയായി വളര്ന്നിരിക്കുകയാണ്. ഭാരതത്തില് ഇന്ന് സംഘപരിവാര് ആദര്ശങ്ങളും കാഴ്ചപ്പാടുകളുമാണ് നിറഞ്ഞുനില്ക്കുന്നത്. സംഘപരിവാര് ആദര്ശങ്ങളിലേക്ക് ഭാരതത്തിലെ എല്ലാവരും വന്നുകൊണ്ടിരിക്കുകയാണ്. പെന്ഷനേഴ്സ് സംഘിന്റെ പ്രവര്ത്തകര്ക്ക് ഇനിയും ഒരുപാട് കാര്യങ്ങള് ചെയ്യാനുണ്ട്. ഒരുപാട് മേഖലകളിലേക്ക് പ്രവര്ത്തനം വ്യാപിപ്പിക്കണം. അതിനായി നാം കൂടുതല് ശ്രദ്ധിക്കണം. സമൂഹനന്മക്കായി സേവന പ്രവര്ത്തനങ്ങളില് നാം വ്യാപൃതരാകണമെന്നും രവീന്ദ്രനാഥ് ചേലേരി പറഞ്ഞു. ചടങ്ങില് കെഎസ്പിഎസ് ജില്ലാ പ്രസിഡന്റ് കെ.എന്.നാരായണന് അദ്ധ്യക്ഷത വഹിച്ചു. എംവി.പ്രഭാകരന് സ്വാഗതം പറഞ്ഞു. കണ്ണൂര് ജില്ലയില് നിന്നും സംസ്ഥാന കമ്മറ്റിയിലേക്ക് തെരഞ്ഞെടുക്കപ്പെട്ട സംസ്ഥാന ഭാരവാഹികള്ക്ക് ചടങ്ങില് സ്വീകരണം നല്കി. എഫ്ഇടിഒ ജില്ലാ പ്രസിഡന്റ് കെ.കെ.വിനോദ്കുമാര് പ്രസംഗിച്ചു. കെഎസ്പിഎസ് ജില്ലാ വൈസ് പ്രസിഡന്റ് സി.സി.രവീന്ദ്രന് മാസ്റ്റര് പത്താം ശമ്പളക്കമ്മീഷന് റിപ്പോര്ട്ടും പെന്ഷന്കാരും എന്ന വിഷയത്തില് മുഖ്യപ്രഭാഷണം നടത്തി. തുടര്ന്ന് ജീവിതശൈലി രോഗങ്ങളും ആരോഗ്യപരിപാലനവും എന്ന വിഷത്തില് ആരോഗ്യബോധവത്കരണ ക്ലാസ്സ് നടത്തി. റിട്ടയേര്ഡ് കണ്ണൂര് ജില്ലാ സ്പോര്ട്സ് കോ-ഓര്ഡിനേറ്റര് കെ.പ്രഭാവതി ടീച്ചര് ക്ലാസ്സെടുത്തു. ജില്ലാ സെക്രട്ടറി എ.കെ.രാമകൃഷ്ണന് നന്ദി പറഞ്ഞു.
ഇടത് വലത് ശക്തികള്ക്കിടയില് പ്രബല ശക്തിയായി പ്രവര്ത്തിക്കാന് പെന്ഷനേഴ്സ് സംഘിന് കഴിഞ്ഞു: രവീന്ദ്രനാഥ് ചേലേരി
പുതിയ വാര്ത്തകള്
ജന്മഭൂമി ഓണ്ലൈന്© Mathruka Pracharanalayam Limited.
Tech-enabled by Ananthapuri Technologies.