പുനലൂര്: സംസ്ഥാന പൊതുമേഖലാ സ്ഥാപനമായ ഓയില് പാമില് നടക്കുന്ന തൊഴിലാളി നിയമനത്തില് ട്രേഡ് യൂണിയന് നേതാക്കള് നടത്തുന്ന വീതംവയ്പും അഴിമതിയും അവസാനിപ്പിക്കണമെന്ന് ബിജെപി പുനലൂര് നിയോജക മണ്ഡലം ഭാരവാഹിയോഗം ആവശ്യപ്പെട്ടു. 80000 രൂപ മുതല് 150000 രൂപ വരെയാണ് തൊഴില് നല്കാമെന്ന് വാഗ്ദാനം നല്കി ട്രേഡ് യൂണിയന് നേതാക്കള് തട്ടുന്നത്. കാലകാലങ്ങളില് ഓയില്പാമില് ഇത്തരത്തിലൂള്ള അഴിമതിയും വീതംവയ്പും തുടര്കഥയാണ്. ഇതിന് അറുതി വരുത്താന് ബിജെപി ശക്തമായ പ്രക്ഷോഭവും നിയമനടപടികളുമായി മുന്നോട്ടുപോകുവാന് യോഗം തീരുമാനിച്ചു. തൊഴിലാളി നിയമനം എംപ്ലോയ്മെന്റ് വഴി നടപ്പിലാക്കണമെന്നും യോഗം ആവശ്യപ്പെട്ടു.
ബിജെപി പുനലൂര് നിയോജക മണ്ഡലം പ്രസിഡന്റ് ആലഞ്ചേരി ജയചന്ദ്രന്റെ അദ്ധ്യക്ഷതയില് കൂടിയ യോഗത്തില് ബിജെപി സംസ്ഥാന സെക്രട്ടറി അഡ്വ.ജെ.ആര്.പത്മകുമാര്, ജനറല് സെക്രട്ടറിമാരായ വടമണ് ബിജു, എന്.വാസുദേവന്, കര്ഷകമോര്ച്ച സംസ്ഥാന വൈസ് പ്രസിഡന്റ് ആയൂര് മുരളി, യുവമോര്ച്ച ജില്ലാ ജനറല് സെക്രട്ടറി അരുണ് ചന്ദ്രശേഖര്, ജില്ലാ കമ്മിറ്റി അംഗങ്ങളായ എസ്.പത്മകുമാരി, വി.ആര്. വിജയന്, പി.ബാനാര്ജി തുടങ്ങിയവര് സംസാരിച്ചു.
