പാലാ: നഗരവാസികള്ക്കെല്ലാം ഹൗസ് കണക്ഷനോടുകൂടി കുടിവെള്ളമെത്തിക്കുന്ന വിപുലമായ പദ്ധതിക്കാണ് പുതിയ നഗരസഭാ കൗണ്സില് ഊന്നല് നല്കുന്നതെന്ന് ചെയര്പേഴ്സണ് ലീനാ സണ്ണിയും വൈസ് ചെയര്മാന് കുര്യാക്കോസ് പടവനും പറഞ്ഞു. പാലാ പ്രസ്സ് ക്ലബ്ബ് സംഘടിപ്പിച്ച മീറ്റ് ദി പ്രസ്സ് ”വിജയം – വികസനം” പരിപാടിയില്’ പങ്കെടുത്ത് സംസാരിക്കുകയായിരുന്നു ഇരുവരും.
45 കോടിയുടെ പദ്ധതിയാണ് തയ്യാറാക്കി സര്ക്കാരിന് സമര്പ്പിച്ചിട്ടുള്ളത്. ഇതിന്റെ ഫൈനല് പ്രോജക്ട് തയ്യാറാക്കാന് അനുമതി ലഭിച്ചു കഴിഞ്ഞതായും നഗരഭരണകര്ത്താക്കള് പറഞ്ഞു. ഒരു വര്ഷത്തിനുള്ളില് പദ്ധതിയുടെ പ്രാരംഭഘട്ട നിര്മ്മാണ പ്രവര്ത്തനങ്ങള് തുടങ്ങാന് കഴിയും. കൊട്ടാരമറ്റം ബസ് ടെര്മിനലിന്റെ ബാക്കിയുള്ള ജോലികള് ഒരുമാസത്തിനുള്ളില് പൂര്ത്തിയാക്കി ബസ് സ്റ്റാന്ഡ് പൂര്ണ്ണതോതില് പ്രവര്ത്തന സജ്ജമാക്കും.ടൗണ്ബസ് സ്റ്റാന്ന്റിലെയും റിവര്വ്യൂ റോഡിലെയും ബള്ബുകള് രാത്രികാലങ്ങളില് മുഴുവന് നേരവും തെളിക്കാന് നടപടി സ്വീകരിക്കും. കേരള കോണ്ഗ്രസ് മാണി ഗ്രൂപ്പിന് ഒറ്റയ്ക്ക് ഭൂരിപക്ഷം ലഭിച്ചതിനാല് യു.ഡി.എഫിലെ ധാരണപ്രകാരം തന്നെയാണ് കോണ്ഗ്രസിന് നേതൃപദവികള് ലഭിക്കാതെ വന്നതെന്ന് വൈസ് ചെയര്മാന് പറഞ്ഞു.
