പറവൂര്: ജില്ലാ പഞ്ചായത്ത് മൂത്തകുന്നം ഡിവിഷനില് ത്രികോണ മത്സരം. ബിജെപി സ്ഥാനാര്ത്ഥി കൗസല്യ സോമസുന്ദറിന്റെ സ്ഥാനാര്ത്ഥിത്തത്തോടുകൂടി ഇടതു-വലതു മുന്നണികള് ആശങ്കയിലാണ്. സ്വന്തം നാട് കണ്ണൂര് ജില്ലയിലെ ഏഴിമലയാണ്. 1980 മുതല് 12 വര്ഷം രാഷ്ട്രസേവികാ സമിതിയുടെ കണ്ണൂര് ജില്ലാ കാര്യവാഹികയായിരുന്നു. പിന്നീട് മഹിളാ മോര്ച്ച പയ്യന്നൂര് മണ്ഡലം പ്രസിഡന്റായിരുന്നു. ബിജെപി കണ്ണൂര് ജില്ലാ കമ്മറ്റി അംഗമായും പ്രവര്ത്തിച്ചിട്ടുണ്ട്. പയ്യന്നൂര് മുനിസിപ്പാലിറ്റിയിലേക്കും ചെറുപുഴ പഞ്ചായത്തിലേക്കും മത്സരിച്ചിട്ടുണ്ട്. കണ്ണൂര് ഏഴിമല നാവിക അക്കാദമിക്കുവേണ്ടി സര്ക്കാര് ജനങ്ങളെ കുടിയൊഴിപ്പിച്ചപ്പോള് മതിയായ നഷ്ടപരിഹാരം നല്കണമെന്നാവശ്യപ്പെട്ട് രൂപീകരിച്ച പൗരസമിതിയുടെ സെക്രട്ടറിയായിരുന്നു കൗസല്യ.മുനമ്പം സ്വദേശി സോമസുന്ദര് വിവാഹം കഴിച്ചതിനുശേഷം ഏഴ് വര്ഷമായി മൂത്തകുന്നത്ത് സ്ഥിരതാമസമാണ്.
തന്റെ പ്രവര്ത്തനപരിചയവും അനുഭവസമ്പത്തും കൈമുതലാക്കി വോട്ടര്മാരെ നേരില്ക്കണ്ട് വോട്ടഭ്യര്ത്ഥിക്കുകയാണ് കൗസല്യ. മൂത്തകുന്നത്ത് മണ്ഡലത്തിന്റെ മുക്കും മൂലയും വ്യക്തികളെയും സ്ഥാപനങ്ങളും സുപരിചിതമാണ് സ്ഥാനാര്ത്ഥിക്ക്. മോദി സര്ക്കാര് ത്രിതല പഞ്ചായത്തുകള്ക്ക് നേരിട്ട് ഫണ്ട് അനുവദിക്കുന്നത് തനിക്ക് ഗുണം ചെയ്യും എന്നാണ് സ്ഥാനാര്ത്ഥിയുടെ പ്രതീക്ഷ.
വടക്കേക്കര പഞ്ചായത്തിലെ 20 വാര്ഡും പുത്തന്വേലിക്കര പഞ്ചായത്തിലെ ഏഴ് വാര്ഡും ചേന്ദമംഗലം പഞ്ചായത്തിലെ 14 വാര്ഡും ചിറ്റാറ്റുകര പഞ്ചായത്തിലെ 18 വാര്ഡും ചേര്ന്നതാണ് മൂത്തകുന്നം ഡിവിഷന്.
വിവിധസമുദായസംഘടനകള് പിന്തുണ പ്രഖ്യാപിച്ചിരിക്കുന്നതും ബിജെപി സ്ഥാനാര്ത്ഥിക്ക് ഗുണം ചെയ്യും. ഒരു വട്ടം പ്രചാരണം പൂര്ത്തിയാക്കിയ കൗസല്യ വാഹന പ്രചാരണത്തിന് തയ്യാറെടുക്കുകയാണ്. കൂടാതെ കുടുംബയോഗങ്ങളിലും സജീവമാണ്.
