കോതമംഗലം: കോതമംഗലം നിയോജകമണ്ഡലത്തിലെ വിവിധ പഞ്ചായത്തുകളിലും കോതമംഗലം മുനിസിപ്പാലിറ്റിയിലുമായി ആറ് വാര്ഡുകളില് ഇന്നലെ ബിജെപി സ്ഥാനാര്ത്ഥികള് നാമനിര്ദ്ദേശ പത്രിക സമര്പ്പിച്ചു. കോതമംഗലം മുനിസിപ്പാലിറ്റിയില് ആദ്യത്തെ നാമനിര്ദ്ദേശ പത്രിക സമര്പ്പിച്ചത് 28-ാം വാര്ഡില് എം.എന്.ഗംഗാധരനാണ്. 14-ാം വാര്ഡില് എന്.രഘു, വാരപ്പെട്ടി 9-ാം വാര്ഡില് നിലവിലെ മെമ്പര് പ്രിയസന്തോഷ്, 8-ാം വാര്ഡില് ഒ.ഡി.സതീശന്, നെല്ലിക്കുഴി 9-ാം വാര്ഡില് പി.വി.അജിത്കുമാര്, കുട്ടമ്പുഴ 11-ാം വാര്ഡില് ബിപിന് ബാലചന്ദ്രന് എന്നിവരാണ് പത്രിക സമര്പ്പിച്ചത്.
ബിജെപി നേതാക്കളായ സന്തോഷ് പത്മനാഭന്, പി.കെ.ബാബു, കെ.ആര്.രജ്ഞിത്, അനില് ആനന്ദ് എന്നിവര് വിവിധ പഞ്ചായത്തുകളില് നാമനിര്ദ്ദേശ പത്രിക സമര്പ്പണത്തിന് നേതൃത്വം നല്കി.
കിഴക്കമ്പലം: ബിജെപി കിഴക്കമ്പലം പഞ്ചായത്തില് മത്സരിക്കുന്ന സ്ഥാനാര്ത്ഥികളുടെ നാമനിര്ദ്ദേശ പത്രിക സമര്പ്പിച്ചു. ഇന്നലെ ഉച്ചയോടെ കിഴക്കമ്പലം ഗ്രാമപഞ്ചായത്ത് സെക്രട്ടറിയും വരണാധികാരിയുമായ കെ.ജെ.ജോയിയുടെ മുമ്പാകെയാണ് പത്രിക സമര്പ്പിച്ചത്. ബിജെപി കിഴക്കമ്പലം പഞ്ചായത്ത് പ്രസിഡന്റ് പി.ആര്.പത്മരാജിന്റെ നേതൃത്വത്തില് പ്രവര്ത്തകരോടൊപ്പം പ്രകടനമായി എത്തിയാണ് പത്രിക സമര്പ്പിച്ചത്. ആനന്ദവല്ലി (ഞാറള്ളൂര്), അനിതകുമാരി മനോജ് (കുന്നത്തുകുടി), സുഭാഷിണി ശ്രീജിന്(പൊയ്യകുന്നം), ആര്യമോഹന് (കിഴക്കമ്പലം) എന്നിവരാണ് നാമനിര്ദ്ദേശ പത്രിക സമര്പ്പിച്ചത്. ബിജെപി നേതാക്കളായ അനില്കുമാര് കാരുകുളം, സതീഷ്.എം.കുമാര്, അനില് കിഴക്കമ്പലം, ശ്രീജിന്, ശിവാനന്ദന് മനോജ്, സി.പി.മനോജ്, സുരേന്ദ്രന്, സനീഷ് എന്നിവര് നേതൃത്വം നല്കി.
പറവൂര്: ഇടത്-വലത് മുന്നണികള് സ്ഥാനാര്ത്ഥികളെ കണ്ടെത്താന് വിഷമിച്ച് നെട്ടോട്ടമോടുമ്പോള് ബിജെപി സ്ഥാനാര്ത്ഥികളെ പ്രഖ്യാപിച്ച് പത്രികാസമര്പ്പണം ആരംഭിച്ചു. കോട്ടുവള്ളി പഞ്ചായത്തിലെ 2-ാം വാര്ഡില് സന്ധ്യാകൃഷ്ണന്, 5-ാം വാര്ഡില് കെ.ആര്. അജികുമാര്, 6-ാം വാര്ഡില് സുലേഖ രാജന്, 7-ാം വാര്ഡില് എം.എസ്. സുബീഷ് എന്നീ ബിജെപി സ്ഥാനാര്ത്ഥികളാണ് കോട്ടുവള്ളി റിട്ടേണിംഗ് ഓഫീസര് മുമ്പാകെ പത്രിക സമര്പ്പിച്ചത്. ബിജെപി പറവൂര് മണ്ഡലം പ്രസിഡന്റ് അജി പോട്ടശ്ശേരി, അനില് ചിറവക്കാട്, എം.എസ്. സതീഷ്, അജി എടയാറ്റ്, എ.എസ്. മനോജ് എന്നിവരും സ്ഥാനാര്ത്ഥിമാരോടൊപ്പം ഉണ്ടായിരുന്നു.
ചേന്ദമംഗലം ഗ്രാമപഞ്ചായത്തിലെ 15-ാം വാര്ഡില് ബിജെപി സ്ഥാനാര്ത്ഥി സൗമിനിബാബു ചേന്ദമംഗലം റിട്ടേണിംഗ് ഓഫീസര് മുമ്പാകെ പത്രിക സമര്പ്പിച്ചു. ചേന്ദമംഗലം പഞ്ചായത്ത് കമ്മറ്റി പ്രസിഡന്റ് എം.ബി. മനോഹരന്, സി.ജി. ലാലപ്പന്, അഭിലാഷ് എന്നിവരും സ്ഥാനാര്ത്ഥിയോടൊപ്പം പത്രികാസമര്പ്പണത്തിന് എത്തിയിരുന്നു.
മൂവാറ്റുപുഴ: മൂവാറ്റുപുഴയില് ആദ്യനാമനിര്ദ്ദേശ പത്രിക സമര്പ്പിച്ചു. നഗരസഭയിലേക്ക് മത്സരിക്കുന്ന രണ്ട് സ്ഥാനാര്ത്ഥികളാണ് നാമനിര്ദേശ പത്രിക സമര്പ്പിച്ചത്. ഒരു കോണ്ഗ്രസ് സ്ഥാനാര്ത്ഥിയും സ്വതന്ത്ര സ്ഥാനാര്ത്ഥിയുമാണ് പത്രിക സമര്പ്പിച്ചത്. യുഡിഎഫ് സ്ഥാനാര്ത്ഥി 20-ാം വാര്ഡില് നിന്ന് മത്സരിക്കുന്ന കോണ്ഗ്രസിലെ ജയക്രഷ്ണന് നായരാണ് ഇന്നലെ ആദ്യപത്രിക സമര്പ്പിച്ചത്. ഉച്ചക്ക് 12.30-നാണ് വരണാധികാരി ജില്ലാ വിദ്യാഭ്യാസ ഓഫീസര് കെ.ജി പ്രിയംവദ മുമ്പാകെ നാമനിര്ദ്ദേശ പത്രിക സമര്പ്പിച്ചത്. നഗരസഭാ മൂന്നാം വാര്ഡില് നിന്നും മത്സരിക്കുന്ന നസീര് അന്ത്രുകൊച്ച് ഇന്നലെ ഉച്ചകഴിഞ്ഞാണ് 2.30-ന് നാമനിര്ദ്ദേശ പത്രിക സമര്പ്പിച്ചത്. 25ഓളം നാമനിര്ദ്ദേശ പത്രികകളാണ് ഇതുവരെ ജില്ലാവരണാധികാരി വിതരണം ചെയ്തിരിക്കുന്നത്.
