കൊച്ചി: കീച്ചേരി സര്‍വ്വീസ് സഹകരണ ബാങ്ക്, അരയന്‍കാവ്, യോഗക്ഷേമം ലോണ്‍സ് ലിമിറ്റഡ് എന്നിവിടങ്ങൡ മുക്കുപണ്ടം പണയപ്പെടുത്തി കോടികള്‍ തട്ടിയെടുത്ത് മുങ്ങിയ മൂന്നുപേരെ ക്രൈംബ്രാഞ്ച് അറസ്റ്റുചെയ്തു. വരിക്കാംകുന്ന് പുളിംപുള്ളില്‍ ഷംസുദ്ദീന്റെ മക്കളായ ഷാമോന്‍ എന്നറിയപ്പെടുന്ന ഷാന്‍ പി.എസ് (31), ഷാജ് പി.എസ് (28) എന്നിവരെയും കുലശേഖരമംഗലം വെള്ളാട്ടുതറയില്‍ സെയ്ദ് മുഹമ്മദ് മകന്‍ ഷാജി വി.എസ് (47) എന്നിവരാണ് അറസ്റ്റിലായത്. സിഐഡി സാമ്പത്തിക കുറ്റാന്വേഷണ വിഭാഗം ഡിവൈഎസ്പി വൈ.ആര്‍. റസ്റ്റത്തിന്റെ നേതൃത്വത്തില്‍ എസ്‌ഐമാരായ ടി.വി. ഷാനന്‍, ഇ.പി. പ്രകാശന്‍, സീനിയര്‍ പോലീസ് ഓഫീസര്‍മാരായ പി.ജെ. ബിജു, വിനോദ്. വി, ജയ്‌മോന്‍പീറ്റര്‍, പി.പി. റോബിന്‍സ്, അന്‍സാരി, സിപിഒ ചന്ദ്രബാബു യു. ഷെട്ടി എന്നിവരടങ്ങിയ സംഘം കോട്ടയം, ആലപ്പുഴ ജില്ലകളിലെ ഒളിസങ്കേതത്തില്‍ ഒരേസമയം നടത്തിയ റെയ്ഡിലാണ് പ്രതികള്‍ അറസ്റ്റിലായത്. രണ്ട് സ്ഥാപനങ്ങളില്‍നിന്നുമായി 23938.590 ഗ്രാമിലേറെ മുക്കുപണ്ടം പണയംവെച്ച് 5.10 കോടി രൂപ തട്ടിയ പ്രതികള്‍ പിതാവായ ഷംസുദ്ദീന്‍ പിടിയിലായതിനെത്തുടര്‍ന്ന് ഒളിവില്‍പോവുകയായിരുന്നു. കന്യാകുമാരി, സേലം, വേദസന്തൂര്‍, കല്ലക്കുറിശ്ശി, ഈറോഡ്, മൈസൂര്‍ തുടങ്ങിയ സ്ഥലങ്ങളില്‍ ഒളിവില്‍ കഴിഞ്ഞ പ്രതികള്‍ ക്രൈംബ്രാഞ്ച് പിന്തുരുന്നു എന്നറിഞ്ഞ് ഉപയോഗിച്ചിരുന്ന മൊബൈല്‍ ഫോണ്‍, സിം എന്നിവ അഭിഭാഷകന്റെ നിര്‍ദ്ദേശാനുസരണം ഉപേക്ഷിച്ച് പെരുന്നാള്‍ പ്രമാണിച്ച് തന്ത്രപൂര്‍വം കേരളത്തിലെ വിവിധ ജില്ലകളില്‍ മാറിമാറി താമസിക്കുകയായിരുന്നു.
അരയന്‍കാവില്‍ സ്വര്‍ണക്കടയില്‍ വിറ്റുവരുന്ന പണം ബിഎംഡബ്ല്യു കാര്‍ ഉള്‍പ്പെടെയുള്ള ആഡംബരവാഹനങ്ങള്‍ വാങ്ങി സുഖലോലുപമായ ജീവിതം നയിക്കുകയായിരുന്നു. റിയല്‍ എസ്‌റ്റേറ്റ് ബിസിനസിനായി കെട്ടിടങ്ങളും ഭൂമിയും വാങ്ങിക്കൂട്ടുകയും ചെയ്തു. പിന്നീട് കച്ചവടത്തിനായി സ്വര്‍ണം വാങ്ങുന്നതിന് പണം തികയാതെ വരുമ്പോള്‍ 1 ഗ്രാം തങ്കത്തില്‍ പൊതിഞ്ഞ സ്വര്‍ണാഭരണങ്ങള്‍ എറണാകുളത്തെയും തൃശൂരിലെയും മൊത്തക്കച്ചവടക്കാരില്‍നിന്നും വാങ്ങി കീച്ചേരി സര്‍വീസ് സഹകരണ ബാങ്ക്, അരയന്‍കാവ് യോഗക്ഷേമം ലോണ്‍സ് ലിമിറ്റഡ് എന്നിവിടങ്ങളിലെയും ഉദ്യോഗസ്ഥരുടെ ഒത്താശയോടുകൂടി പണയംവെച്ചു. 23938.590 ഗ്രാമോളം മുക്കുപണ്ടം പലഘട്ടങ്ങളിലായി പണയംവെച്ചാണ് ബാങ്കില്‍നിന്നും 5.10 കോടി രൂപ കബളിപ്പിച്ച് നേടിയത്. പണയപ്പെടുത്തിയ ആഭരണങ്ങള്‍ അധികൃതര്‍ കാലികപരിശോധനയില്‍ ക്ലാവ് പിടിച്ചത് ശ്രദ്ധയില്‍പ്പെട്ടതിനെത്തുടര്‍ന്ന് നടത്തിയ പരിശോധനയിലാണ് തട്ടിപ്പ് പുറത്തുവന്നത്.
