കുണ്ടറ: പെരുമ്പുഴ താഴം കാമ്പിക്കടക്ക് സമീപമുള്ള വില്ലൂര് കുളം മദ്യപാനി-മയക്കുമരുന്ന് സംഘത്തിന്റെ താവളമായി മാറിയെന്ന് നാട്ടുകാര് പരാതിപ്പെടുന്നു. നിരവധി തവണ പോലീസില് അറിയിച്ചെങ്കിലും നടപടികള് ഇല്ലാത്തതിനാല് നാട്ടുകാര് ഭയപ്പാടിലാണ്. രാപ്പകലില്ലാതെയാണ് ഇവര് കുളക്കടവ് കയ്യടക്കുന്നത്. ചുറ്റുമതില് നിര്മ്മിച്ചിട്ടുള്ളതിനാല് കുളക്കടവില് ഇരിക്കുന്നവരെ പുറത്തുള്ളവര്ക്ക് കാണാന് കഴിയില്ല. ഇത് മുതലാക്കിയാണ് സംഘം ഇവിടെ ഒത്തുചേരുന്നത്. നാടിന് വെളിയിലുള്ളവരും എത്തുന്നുവെന്നും ഇവര് മയക്കുമരുന്ന് ഇടപാടുകാരാണോ എന്ന് സംശയിക്കുന്നതായും നാട്ടുകാര് ആരോപിക്കുന്നു.
വേനല്ക്കാലമായാല് നാടിന് ആശ്രയമായ ഈ കുളക്കടവും പരിസരവും നാട്ടുകാര്ക്ക് ഇപ്പോള് ഭീതി നല്കുന്ന പ്രദേശമാണ്. എസ്എന് പബ്ലിക് സ്കൂള്, വില്ലൂര് മാടന്കാവ് ക്ഷേത്രം എന്നിവക്ക് സമീപമായാണ് ഈ കുളം. സംഘം ചേര്ന്ന് നിന്ന് പെണ്കുട്ടികളേയും സ്ത്രീകളേയും ശല്യം ചെയ്യുന്നവരും പതിവായതിനാല് ഇതുവഴി നടക്കാന് പോലും കഴിയാത്ത അവസ്ഥയാണ്. അടിയന്തിരമായി പൊലീസ് ഇടപെട്ട് നടപടികള് സ്വീകരിക്കണമെന്നാണ് നാട്ടുകാരുടെ ആവശ്യം.
