കൊച്ചി: തദ്ദേശ സ്വയംഭരണ സ്ഥാപനങ്ങളിലെ തെരഞ്ഞെടുപ്പിന് സംവരണ വാര്ഡുകള് നിശ്ചയിക്കുന്നതിന് മാര്ഗനിര്ദേശമായി. സ്ത്രീ, പട്ടികജാതി സ്ത്രീ, പട്ടികവര്ഗ സ്ത്രീ, പട്ടികജാതി, പട്ടികവര്ഗം എന്നീ അഞ്ച് വിഭാഗങ്ങളിലായാണ് സംവരണ വാര്ഡുകള് (നിയോജക മണ്ഡലങ്ങള്) നിശ്ചയിക്കുന്നത്. 26, 28 തീയതികളിലാണ് ജില്ലയിലെ സംവരണ വാര്ഡുകളുടെ നിര്ണയം പൂര്ത്തീകരിക്കുക.
സ്ത്രീ സംവരണ മണ്ഡലങ്ങളാണ് ആദ്യം നിശ്ചയിക്കുക. 2010ലെ തെരഞ്ഞെടുപ്പില് സ്ത്രീ സംവരണമല്ലാതിരുന്ന എല്ലാ വാര്ഡുകളും ഇക്കുറി സ്ത്രീ സംവരണമായിരിക്കും. ആകെ വാര്ഡുകളുടെ എണ്ണം ഒറ്റസംഖ്യയാവുകയും സംവരണ വാര്ഡുകള് എണ്ണം തികയാതെ വരികയും ചെയ്യുന്ന ഘട്ടത്തില് ഇപ്പോള് ഒഴിവാക്കിയവയില് നിന്ന് നറുക്കെടുത്ത് നിശ്ചയിക്കുന്ന വാര്ഡും സ്ത്രീ സംവരണമായിരിക്കും. പട്ടികജാതി സ്ത്രീ സംവരണ വാര്ഡുകളാണ് രണ്ടാമതായി തീരുമാനിക്കുക. സ്ത്രീ സംവരണമായി തീരുമാനിക്കുന്ന വാര്ഡുകളില് 2010ലെ പട്ടികജാതി/പട്ടികജാതി സ്ത്രീ വാര്ഡുകള് ഉള്പ്പെട്ടിട്ടുണ്ടെങ്കില് അവ ഒഴിവാക്കി ബാക്കിയുള്ള സ്ത്രീ സംവരണ വാര്ഡുകളില് നിന്ന് നറുക്കെടുപ്പിലൂടെ പട്ടികജാതി സ്ത്രീ സംവരണ വാര്ഡുകള് നിശ്ചയിക്കും.
മൂന്നാമതായി പട്ടികവര്ഗ സ്ത്രീ സംവരണ വാര്ഡുകള് നിശ്ചയിക്കും. സ്ത്രീ സംവരണ വാര്ഡുകളില് 2010ലെ പട്ടികവര്ഗ/പട്ടികവര്ഗ സ്ത്രീ വാര്ഡുകള് ഉള്പ്പെട്ടിട്ടുണ്ടെങ്കില് അവയും പട്ടികജാതി സ്ത്രീ സംവരണ വാര്ഡുകളും ഒഴിവാക്കി ബാക്കിയുള്ള സ്ത്രീ സംവരണ വാര്ഡുകളില് നിന്നും നറുക്കെടുപ്പിലൂടെ പട്ടികവര്ഗ സ്ത്രീ സംവരണ വാര്ഡുകള് നിശ്ചയിക്കും. പട്ടികജാതി സംവരണ വാര്ഡുകളാണ് നാലാമതായി നിശ്ചയിക്കുക. പഞ്ചായത്തിലെ ആകെ വാര്ഡുകളില് നിന്നും സ്ത്രീ, പട്ടികജാതി സ്ത്രീ, പട്ടികവര്ഗ സ്ത്രീ എന്നീ സംവരണ വാര്ഡുകളും 2010ലെ പട്ടികജാതി/പട്ടികജാതി സ്ത്രീ സംവരണ വാര്ഡുകളും ഒഴിവാക്കി ബാക്കിയുള്ളവയില് നിന്നും നറുക്കെടുപ്പിലൂടെ പട്ടികജാതി സംവരണ വാര്ഡുകള് നിശ്ചയിക്കും.
അവസാനമായി പട്ടികവര്ഗ സംവരണ വാര്ഡുകള് തീരുമാനിക്കും. സ്ത്രീ, പട്ടികജാതി സ്ത്രീ, പട്ടികവര്ഗ സ്ത്രീ, പട്ടികജാതി സംവരണ വാര്ഡുകളും 2010ലെ പട്ടികവര്ഗ/പട്ടികവര്ഗ സ്ത്രീ സംവരണ വാര്ഡുകളും ഒഴിവാക്കി ബാക്കിയുള്ളവയില് നിന്നും നറുക്കെടുപ്പിലൂടെ പട്ടികവര്ഗ സംവരണ വാര്ഡുകള് നിശ്ചയിക്കും.
