ആലുവ: മനുഷ്യമനസിലെ വൈകൃതമാണ് ഇന്നും ചിലയിടങ്ങളില് ഗുരുനിന്ദക്ക് കാരണമെന്ന് ആലുവ അദ്വൈതാശ്രമം സെക്രട്ടറി സ്വാമി ശിവസ്വരൂപാനന്ദ പറഞ്ഞു. ഗുരുവിനെയും ഗുരുസന്ദേശത്തെയും തുറന്നുസ്വീകരിക്കാന് കഴിയാത്തവര് ഇന്നും സമൂഹത്തിലുണ്ടെന്നും സ്വാമി പറഞ്ഞു.
ശ്രീനാരായണ ഗുരുവിന്റെ 88-ാം മഹാസമാധി ദിനത്തോടനുബന്ധിച്ച് ആലുവ അദ്വൈതാശ്രമത്തില് നടന്ന സത്സംഗത്തില് പ്രഭാഷണം നടത്തുകയായിരുന്നു സ്വാമി.
സമൂഹത്തെ പൊതുനന്മയിലേക്ക് നയിക്കാനാണ് ഗുരു ശ്രമിച്ചത്. മനുഷ്യവര്ഗത്തിന്റെ സമുദ്ധാരകനായിരുന്നു ഗുരു. പ്രായോഗിക ജീവിതത്തില് ഗുരുവിന്റെ സന്ദേശം നിലനിര്ത്തുകയെന്നത് നമ്മുടെ കടമയാണ്. ഗുരു ആത്മീയതയെ കുറിച്ച് പറഞ്ഞത് ക്ഷേത്രങ്ങള് വര്ദ്ധിപ്പിക്കാനായിരുന്നില്ല. മറിച്ച് മാനുഷീക മൂല്യങ്ങളെ ഉയര്ത്തുകയാണ് സ്വാമി ആത്മീയത കൊണ്ട് ഉദ്ദേശിച്ചത്.
ഇന്ന് കുടുംബ ജീവിതത്തിലെ മൂല്യ തകര്ച്ച വ്യാപകമായി. ഗുരുക്കന്മാര് നമ്മെ ഒന്നിപ്പിക്കാനാണ് ശ്രമിച്ചത്. ഭിന്നിപ്പിക്കാനല്ലെന്നും സ്വാമി പറഞ്ഞു. മഹാസമാധി ദിനത്തോടനുബന്ധിച്ച് ആശ്രമത്തില് നടന്ന പ്രത്യേക പൂജകള്ക്ക് ആശ്രമം ഗുരു മണ്ഡപം മേല്ശാന്തി പി.കെ. ജയന്തന് മുഖ്യകാര്മ്മികത്വം വഹിച്ചു.
പുലര്ച്ചെ അഞ്ചിന് പ്രഭാത പൂജയോടെ ചടങ്ങുകള് ആരംഭിച്ചു. ശാന്തിഹവനം, ഗണപതിഹവനം, ഗുരുദേവ കൃതികളുടെ പാരായണം, സര്വ്വമത പ്രാര്ത്ഥന, ഖുറാന് പാരായണം, ബൈബിള് പാരായണം, മഹാസുദര്ശന ഹോമം, മഹാസമാധി പൂജ, സമൂഹപ്രാര്ത്ഥന, പ്രസാദ വിതരണം, അന്നദാനം എന്നിവയും നടന്നു. സമൂഹ പ്രാര്ത്ഥനയില് ആയിരത്തിലേറെ ശ്രീനാരായണീയര് പങ്കെടുത്തു.
