കോഴിക്കോട്: കോഴിക്കോട്ടെ ഓട്ടോറിക്ഷ ഡ്രൈവര്മാരുടെ സത്യസന്ധത ഒരിക്കല്കൂടി പുറം ലോകം അംഗീകരിച്ചു. സൗത്ത് വയനാട് ഡിവിഷണല് ഫോറസ്റ്റ് സര്വേയര് പ്രമോദും കുടുംബവുമാണ് ഇത്തവണ കോഴിക്കോട്ടെ ഓട്ടോക്കാരുടെ നന്മ അനുഭവിച്ചറിഞ്ഞത്. കോഴിക്കോട് നഗരത്തില് നടന്ന ഒരു കല്യാണത്തില് പങ്കെടുക്കാന് എത്തിയ പ്രമോദും കുടുംബവും തങ്ങളുടെ ബാഗ് ഓട്ടോറിക്ഷയില് മറന്നുവെക്കുകയായിരുന്നു. കോഴിക്കോട് നഗരത്തില് നിന്ന് പന്തീരാങ്കാവ് ഒതയമംഗലത്തേക്കാണ് ഓട്ടോറിക്ഷ വിളിച്ചിരുന്നത്. ഏകദേശം 35,000 രൂപ വില വരുന്ന നിക്കോണ് എസ്എല്ആര് ക്യാമറയും ബാഗിനകത്ത് ഉണ്ടായിരുന്നു.
വൈകുന്നേരം വണ്ടി നിര്ത്തിയിട്ട് പരിശോധിച്ചപ്പോഴാണ് ഓട്ടോ ഡ്രൈവര് കുട്ടിമമ്മി ക്യാമറ ഉള്പ്പെടുന്ന ബാഗ് കണ്ടത്. തന്റെ സുഹൃത്തുക്കളായ ഓട്ടോ ഡ്രൈവര്മാരെയും കുട്ടിമമ്മി ഇക്കാര്യം വിളിച്ചറിയിച്ചു. ക്യാമറ നഷ്ടപ്പെട്ട പ്രമോദ് ടൗണ്പോലീസ് സ്റ്റേഷനിലും പോലീസ് കണ്ട്രോള് റൂമിലും രേഖാമൂലം പരാതി നല്കുകയും ചെയ്തു. മറ്റ് ഓട്ടോ ഡ്രൈവര്മാര് പറഞ്ഞതനുസരിച്ച് എല്ലാ ഓട്ടോ സ്റ്റാന്റിലും ബാഗ് നഷ്ടപ്പെട്ട വിവരം കാണിച്ചുകൊണ്ട് പരസ്യം പതിച്ചു. ചില ഡ്രൈവര്മാര് ഇതിന്റെ കോപ്പി വാങ്ങി തങ്ങളുടെ ഓട്ടോറിക്ഷകളുടെ പുറകില് പതിക്കുകയും ചെയ്തു.
ഈ പരസ്യം കണ്ട ഒരു ഡ്രൈവറാണ് കുട്ടിമമ്മിക്ക് ഉടമസ്ഥന്റെ നമ്പര് കൊടുത്തത്. തുടര്ന്ന് കുട്ടിമമ്മി ഉടമസ്ഥരെ ബന്ധപ്പെട്ട്. ക്യാമറയും ബാഗും തിരിച്ചേല്പ്പിച്ചു. നഷ്ടപ്പെട്ടെന്ന് കരുതിയ ക്യാമറ തിരിച്ചുകിട്ടിയ സന്തോഷത്തിലാണ് പ്രമോദും കുടുംബവും. ചേളന്നൂര് പുനത്തില്താഴം എടവന്കാട്ടിലാണ് എംപി കുട്ടിമമ്മി താമസിക്കുന്നത്. മുപ്പത്തിരണ്ടു വര്ഷമായി കോഴിക്കോട്ട് ഓട്ടോറിക്ഷ ഡ്രൈവറാണ്. ഇപ്പോള് കനിയാത്തപൊയില് കോയയുടെ കെഎല് 11 എപി 9058 നമ്പര് ഓട്ടോയുടെ ഡ്രൈവറാണ്. റസിയയാണ് ഭാര്യ. സലീത്ത്, സാഭിത്, സാജു, സൈനു എന്നിവര് മക്കളാണ്.
ഓട്ടോയില് മറന്നുവെച്ച ബാഗ് കുട്ടിമമ്മി
പ്രമോദിന് കൈമാറുന്നു
