കോഴിക്കോട്: ശാരീരിക – മാനസിക വെല്ലുവിളി നേരിടുന്ന സ്കൂള് വിദ്യാര്ത്ഥിനിക്ക് 2013-2014 സാമ്പത്തികവര്ഷത്തില് ചക്കിട്ടപ്പാറ ഗ്രാമപഞ്ചായത്ത് നിഷേധിച്ച സ്കോളര്ഷിപ്പ് അടിയന്തിരമായി അനുവദിക്കാന് സംസ്ഥാന മനുഷ്യാവകാശ കമ്മീഷന് (ജുഡീഷ്യല്) അംഗം ആര്. നടരാജന് കോഴിക്കോട് പഞ്ചായത്ത് ഡെപ്യൂട്ടി ഡയറക്ടര്ക്ക് നിര്ദ്ദേശം നല്കി.
ചക്കിട്ടപ്പാറ ചെമ്പനോട പെരുവേലില് ബെന്നിമാത്യു സമര്പ്പിച്ച പരാതിയിലാണ് നടപടി. പരാതിക്കാരന്റെ മകള് ചെമ്പനോട സെന്റ് ജോസഫ് സ്കൂളില് വിദ്യാര്ത്ഥി നിയാണ്. കമ്മീഷന് പഞ്ചായത്ത് ഡെപ്യൂട്ടി ഡയറക്ടറില് നിന്നും വിശദീകരണം ആവശ്യപ്പെട്ടിരുന്നു. കുട്ടി ഏതു ക്ലാസ്സില് പഠിക്കുന്നു എന്ന് രേഖപ്പെടുത്താതിരുന്നതിനാലാണ് അപേക്ഷ നിരസിച്ചതാണെന്ന് പറഞ്ഞത്. അതേസമയം ചക്കിട്ടപ്പാറ പഞ്ചായത്ത് സെക്രട്ടറി നല്കിയ വിശദീകരണത്തില് സ്പെഷ്യല് സ്കൂളില് പഠിക്കുന്ന കുട്ടികള്ക്ക് സ്കോളര്ഷിപ്പ് നല്കാന് ഫണ്ടിന്റെ അപര്യാപ്തതയുണ്ടെന്ന് പറയുന്നു.
പരാതിക്കാരന്റെ മകള്ക്ക് സ്കോളര്ഷിപ്പ് നല്കാതിരുന്നതിന് ന്യായീകരണമില്ലെന്ന് കമ്മീഷന് നിരീക്ഷിച്ചു. ഫണ്ടിന്റെ കുറവാണ് കാരണമെന്നത് അംഗീകരിക്കാനാവില്ലെന്നും ഉത്തരവില് പറയുന്നു.
സ്കോളര്ഷിപ്പ് നല്കാന് ആവശ്യമായ നിര്ദ്ദേശം നല്കണമെന്നും കമ്മീഷന് അംഗം ആര്. നടരാജന് ഉത്തരവില് ആവശ്യപ്പെട്ടു.
