ചേര്‍ത്തല: നാരായണീയ പാരായണം മനസ്സിനെ മാത്രമല്ല നാടിന്റെ അന്തരീക്ഷവും ശുദ്ധീകരിക്കുമെന്ന് തിരുവനന്തപുരം കവടിയാര്‍ കൊട്ടാരത്തിലെ ഗൗരി പാര്‍വ്വതീഭായി തമ്പുരാട്ടി. അറവുകാട് ദേവീക്ഷേത്രത്തില്‍ നടക്കുന്ന നാരായണീയ മഹാസത്രത്തിന്റെ വിളംബരമായി നടന്ന നാരായണീയ സന്ദേശ ശിബിരത്തിന്റെ ഭദ്രദീപ പ്രകാശനവും സ്വാഗതസംഘം ഓഫീസ് ഉദ്ഘാടനവും നിര്‍വഹിക്കുകയായിരുന്നു അവര്‍.
ഭക്തജന സമ്പര്‍ക്കത്തിലൂടെ മനുഷ്യന്റെ ജീവിതം ശുദ്ധീകരിക്കാനാകുമെന്നും ഗൗരി പാര്‍വ്വതീഭായി പറഞ്ഞു. ആലുവ അദ്വൈതാശ്രമം സെക്രട്ടറി സ്വാമി ശിവസ്വരൂപാനന്ദ അദ്ധ്യക്ഷത വഹിച്ചു. സമ്മേളന ഉദ്ഘാടനം ശാന്തിഗിരി ഓര്‍ഗനൈസിംഗ് സെക്രട്ടറി സ്വാമി ഗുരുരത്‌നം ജ്ഞാനതപസ്വി നിര്‍വ്വഹിച്ചു. സത്രം ചീഫ് കോര്‍ഡിനേറ്റര് ദിനേശന് വലിയവീട്ടില് ശിബിര വിശദീകരണം നടത്തി.
അറവുകാട് ദേവസ്വം പ്രസിഡന്റ് എം.ജി.പുരുഷന്‍, നാരായണീയ പ്രചാരസഭ സംസ്ഥാന പ്രസിഡന്റ് എന്‍. ശ്രീകുമാര്‍, ജനറല്‍ കണ്‍വീനര്‍ എ.ടി. ദിനേശന്, ചെയര്‍മാന്‍ വി.കെ. സുനില്‍കുമാര്‍, കനകമ്മ തുടങ്ങിയവര്‍ പ്രസംഗിച്ചു.
സതീഷ് കുമാര്‍, പ്രൊഫ. മുത്തുലക്ഷ്മി തിരുവനന്തപുരം എന്നിവരാണ് ശിബിരം നയിച്ചത്. പത്മിനികുഞ്ഞമ്മ, ഇന്ദിര വി. പിള്ള, ചന്ദ്രലേഖ എന്നിവര്‍ മോഡറേറ്റര്‍മാരായി. സംസ്ഥാനത്തെ വിവിധ ഭാഗങ്ങളില്‍ നിന്നുള്ള നാരായണീയ പാരായണ സമിതികളിലെ 1008 നാരായണീയ പാരായകര്‍ സഹസ്രനാമാര്‍ച്ചനയോടെയാണ് ശിബിരത്തിനു തുടക്കമായത്.
ഡിസംബര്‍ ഒന്നു മുതല്‍ ആറുവരെയാണ് അറവുകാട് ക്ഷേത്രത്തില്‍ ഒമ്പതാമത് നാരായണീയ മഹാസത്രം നടക്കുന്നത്.
