കൊച്ചി: ജില്ലാ ഭരണകൂടവും ജില്ലാ ടൂറിസം പ്രൊമോഷന്‍ കൗണ്‍സിലും ചേര്‍ന്നൊരുക്കുന്ന ഓണം വാരാഘോഷം ”ലാവണ്യം” ഇന്ന് തുടക്കംകുറിക്കും. കൊച്ചി നഗരസഭയുടെ സഹകരണത്തോടെദര്‍ബാര്‍ ഹാള്‍ ഓപ്പണ്‍ എയര്‍ ഓഡിറ്റോറിയത്തില്‍ 31 വരെയാണ് പരിപാടികള്‍. ഇന്ന് വൈകിട്ട് 4ന് മറൈന്‍ ഡ്രൈവ് ഗ്രൗണ്ടില്‍ നിന്നും ആരംഭിക്കുന്ന വര്‍ണ്ണാഭമായ ഘോഷയാത്രയോടെ ഓണാഘോഷങ്ങള്‍ക്ക് തുടക്കമാകും.
ഉദ്ഘാടന സമ്മേളനത്തില്‍ മന്ത്രിമാര്‍, എംഎല്‍എമാര്‍, സാംസ്‌കാരിക-സിനിമാരംഗത്തെ പ്രമുഖര്‍ തുടങ്ങിയവര്‍ പങ്കെടുക്കും. ഉത്തര ഉണ്ണി അവതരിപ്പിക്കുന്ന നൃത്തശില്‍പ്പത്തോടെയാണ് കലാസന്ധ്യകള്‍ക്ക് ആരംഭിക്കുന്നത്. വള്ളുവനാടന്‍ കൃഷ്ണകലാനിലയം അവതരിപ്പിക്കുന്ന നാടന്‍ കലാസന്ധ്യയും അരങ്ങേറും. 31 വരെ വൈകിട്ട് അഞ്ചിനാണ് ദര്‍ബാര്‍ ഹാള്‍ ഓപ്പണ്‍ എയര്‍ തിയേറ്ററില്‍ വിവിധയിനം കലാപരിപാടികള്‍ അരങ്ങേറും. ഉത്രാടദിനത്തില്‍ വൈകുന്നേരം അഞ്ചിന് പ്രശസ്ത സംഗീതസംവിധായകന്‍ ജെറി അമല്‍ദേവിന്റെ നേതൃത്വത്തിലുള്ള പ്രത്യേക സംഗീതവിരുന്ന് ‘സിംഗ് ഇന്ത്യ വിത്ത് ജെറി അമല്‍ദേവ്’. തുടര്‍ന്ന് സാംബാസ് അവതരിപ്പിക്കുന്ന മെഗാഷോയില്‍ സോണി ടിവിയിലൂടെ ശ്രദ്ധേയനായ ഫുട്‌ബോള്‍ മാന്ത്രികനടക്കമുള്ള കലാകാരന്മാര്‍ സദസ്യര്‍ക്ക് വിസ്മയമാവും. തിരുവോണദിനത്തില്‍ സന്ധ്യയില്‍ ക്ഷേത്രകലകളും പ്രദീപ് നയിക്കുന്ന സംഗീതസന്ധ്യ. തുടര്‍ന്ന് ദേവന്‍ കക്കാട് അവതരിപ്പിക്കുന്ന ചാക്യാര്‍ കൂത്തിനു ശേഷം കോമഡിയില്‍ 25 വര്‍ഷം പിന്നിടുന്ന കോട്ടയം നസീര്‍ ഒരുക്കുന്ന മെഗാ ഷോയും ഉണ്ടാകും.
അവിട്ടദിനത്തില്‍ വൈകിട്ട് 5ന് ‘ധിമി’ എന്ന പേരിലുള്ള സംഗീത ബാന്‍ഡിന്റെ അവതരണത്തോടെ ഉണരുന്ന വേദിയില്‍, തുടര്‍ന്ന് പാടിപ്പതിഞ്ഞ ഗാനങ്ങളുടെ ‘അണ്‍പ്ലഗ്ഡ്’ ആലാപനവുമായി ദേവദാസ് രംഗപ്രവേശം ചെയ്യും. പ്രശസ്ത ചലച്ചിത്ര പിന്നണിഗായകരായ നജിം അര്‍ഷാദ്, മൃദുല വാര്യര്‍ എന്നിവരടക്കമുള്ളവരുടെ സംഗീതപ്പെരുമഴ തീര്‍ക്കും.
30ന് ചലച്ചിത്ര താരങ്ങളായ ഗിന്നസ് പക്രു, സാജു നവോദയ, ബിജുക്കുട്ടന്‍, ദേവീചന്ദന തുടങ്ങിയവര്‍ നയിക്കുന്ന ഗിന്നസ് പക്രു ഷോ രാത്രി 7.30 മുതല്‍ വേദിയില്‍ ചിരിപ്പടക്കം തീര്‍ക്കുമ്പോള്‍ അതിനു മുന്‍പ് വൈകുന്നേരം 5ന് ‘കൊച്ചിന്‍ ഇ മെയില്‍സ് ഒരുക്കുന്ന ഓണനിലാവ്’ എന്ന സംഗീതപരിപാടിയും ഉണ്ടായിരിക്കും.
31ന് കൈതപ്രം ദാമോദരന്‍ നമ്പൂതിരിയുടെ സാന്നിധ്യം ദര്‍ബാര്‍ ഹാള്‍ ഓപ്പണ്‍ എയര്‍ തിയേറ്ററിലെ വേദിക്കു പകിട്ടേകും. ഏറെ നാളത്തെ ഇടവേളയ്‌ക്കു ശേഷം ജില്ലയില്‍ കൈതപ്രം ദാമോദരന്‍ നമ്പൂതിരിയും മകന്‍ ദീപാങ്കുരനും ചേര്‍ന്നു നയിക്കുന്ന സംഗീതവിരുന്ന് മലയാളത്തനിമയുള്ള ഗാനങ്ങളുടെ ആസ്വാദനത്തിന് അരങ്ങൊരുക്കും. വൈകുന്നേരം അഞ്ചിന് വിന്‍ഡ്‌സ് ആന്‍ഡ് വേവ്‌സ്’ എന്ന ബാന്‍ഡ് അവതരണവും ഓണാഘോഷത്തിനു ചാരുത പകരും.
