കൊച്ചി: പോലീസ് സേനക്കുള്ളില്‍ ഡ്യൂട്ടി പരിഷ്‌ക്കാരത്തെ ചൊല്ലി ഏറ്റുമുട്ടല്‍. ക്രമസമാധാനചുമതലയുള്ള ഡിസിപി ഹരിശങ്കറും പോലീസ് അസോസിയേഷനും തമ്മിലാണ് വടം വലിശക്തമായത്. പുതിയ പരിഷ്‌ക്കാരങ്ങള്‍ അമിത ജോലിഭാരം അടിച്ചേല്‍പ്പിക്കുന്നതാണെന്ന് പോലീസുകാര്‍ പരാതിപ്പെടുന്നു. അതേസമയം പരിഷ്‌ക്കാരങ്ങള്‍ സേനയുടെ നിലവാരം മെച്ചപ്പെടുത്താനും ജനങ്ങള്‍ക്ക് കൂടുതല്‍ സേവനം ലഭ്യമാക്കനും വേണ്ടിയാണെന്ന നിലപാടിലാണ് ഡിസിപി. എന്തായാലും രണ്ട്കൂട്ടരും നിലപാടില്‍ ഉറച്ച് നില്‍ക്കുന്നതോടെ സിറ്റി പോലീസില്‍ കലഹം മൂര്‍ഛിക്കുകയാണ്.
വേണ്ടത്ര അനുഭവം സിദ്ധിക്കാത്ത കമ്മീഷണര്‍ കീഴ് ജീവനക്കാരുടെ പ്രശ്‌നങ്ങള്‍ മനസ്സിലാക്കാതെ കോര്‍പ്പറേറ്റ് സ്ഥാപനങ്ങളിലെ ഭരണാധികാരികളേക്കാള്‍ ഹീനമായാണ് പെരുമാറുന്നതെന്നാണ് പരാതി. എട്ട്മണിക്കൂറിലധികം ജോലിചെയ്യുന്ന പോലീസുകാര്‍ക്കിടയില്‍ പുതിയ പരിഷ്‌ക്കാരങ്ങള്‍ അധിക ജോലിഭാരം അടിച്ചേല്‍പ്പിച്ചിരിക്കയാണ്. 12ലധികം മണിക്കൂര്‍ ജോലിചെയ്യണമെന്നതാണ് ഇപ്പോഴത്തെ സ്ഥിതി.
ആവശ്യത്തിന് പോലീസുകാരില്ലാത്ത സിറ്റിയില്‍ കൂടുതല്‍ ഡ്യൂട്ടികള്‍ സൃഷ്ടിച്ച് പോലീസുകാരെ വട്ടംകറക്കുകയാണ്. അടിക്കടിയുണ്ടാകുന്ന ഡ്യൂട്ടിമാറ്റങ്ങള്‍ പോലീസുകാരുടെ മനോവീര്യം നശിപ്പിക്കുന്നതായും സേനാംഗങ്ങള്‍ക്കിടയില്‍ സംസാരമുണ്ട്. സേനയായതിനാല്‍ മേധാവിയുടെ വാക്കിന് എതിര്‍വാക്കുണ്ടാകില്ലെന്നതാണ് നിര്‍ദ്ദേശങ്ങള്‍ക്ക് പിന്നിലെന്ന് പോലീസുകാര്‍.
പുതിയ പരിഷ്‌ക്കാരങ്ങള്‍ പ്രകാരം സ്വകാര്യ ബസ്സില്‍ പരുഷ-വനിതാ പോലീസുകാര്‍ കറങ്ങി നടക്കണം. ഇത് കള്ളന്മാരേയും, പിടിച്ച് പറിക്കാരേയും ബസ്സില്‍ നിന്ന് അകറ്റുമെന്നാണ് അറിയിപ്പ്.
ഈ ഡ്യൂട്ടി രാവിലെ 8 മുതല്‍ വൈകിട്ട് 7.30 വരെ തുടരും. കൂടാതെ ഒരു സ്റ്റേഷനില്‍ നിന്ന് രണ്ട് വീതം പോലീസുകാരെ ഉള്‍പ്പെടുത്തി 13.30 മണിക്കൂര്‍ നീണ്ട് നില്‍ക്കുന്ന റോമിയോ പെട്രോളിംഗ്, വൈകുന്നേരം ഡ്യൂട്ടിക്ക് കയറുന്ന പോലീസുകാര്‍ രാവിലെ പെട്രോള്‍ ഡ്യൂട്ടിക്ക് ശേഷം ഒമ്പത് മണിക്ക് മാത്രമേ സ്റ്റേഷനില്‍ നിന്ന് പോകാവൂ, ജിഡി ചാര്‍ജും, ഒരു പാറവ് പോലീസുകാരനും രാത്രി 9 മണിമുതല്‍ 11 മണിവരെ റോമിയോ പെട്രോളിംഗ് നടത്തണം, പോലീസ്‌കാരന്‍ നേരിട്ട് കൂടുതല്‍ കേസുകള്‍ ചാര്‍ജ് ചെയ്യണം. എന്നിങ്ങനെ പോകുന്നു പരിഷ്‌ക്കാരങ്ങള്‍.
പരിഷ്‌ക്കാരങ്ങളിലൂടെ ജനങ്ങള്‍ക്ക് മെച്ചപ്പെട്ട പോലീസ് സേവനം ലഭ്യമാകുമെങ്കിലും പോലീസുകാരുടെ ജോലിഭാരം കൂടും. കൊച്ചിയില്‍ പോലീസുകാരുടെ സേവനം ആവശ്യത്തിന് ലഭ്യമാകുന്നില്ലെന്നാണ് നാട്ടുകാരുടെ പരാതി. ഇതിന് പോലീസുകാരുടെ എണ്ണത്തില്‍ വര്‍ദ്ധനവ് വരുത്തണം. ഇതുണ്ടായിട്ടില്ല. നിലവിലെ സാഹചര്യത്തില്‍ പോലീസുകാരുടെ അധിക സമയ ഡ്യൂട്ടി അവരുടെ ക്രയശേഷികുറക്കുമെന്ന് അഭിപ്രായമുണ്ട്.
