കൊച്ചി: റിസര്വ് ബാങ്ക് രാജ്യത്ത് ഓണ്ലൈന്, മൊബൈല്, പ്ലാസ്റ്റിക് മണി ബാങ്കിങ്ങ് സമ്പ്രദായം വ്യാപിപ്പിക്കുന്നതിന് ഊന്നല് നല്കുമെന്ന് റിസര്വ് ബാങ്ക് ജനറല് മാനേജര് യു ചിരഞ്ജീവി. ക്യാഷ് മുഖേനയുള്ള വിനിമയ നിരക്കു കൂടുതലുള്ള സമൂഹത്തില് അഴിമതിയുടെ തോതും കൂടുതലായിരിക്കുമെന്നും അദ്ദേഹം പറഞ്ഞു.
കേന്ദ്ര സര്ക്കാര് ആവിഷ്കരിച്ച പ്രധാന്മന്ത്രി ജീവന് ജ്യോതി ബീമ യോജന, പ്രധാന്മന്ത്രി സുരക്ഷ ബീമ യോജന, അടല് പെന്ഷന് യോജന എന്നീ സാമൂഹ്യ സുരക്ഷാ പദ്ധതികളുടെ ജില്ലാതല അവലോകന, ബോധവല്ക്കരണ യോഗം എറണാകുളം സെന്റ് തെരേസാസ് കോളേജ് ഓഡിറ്റോറിയത്തില് ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം.
യോഗത്തില് സെന്റ് തെരേസാസ് കോളേജ് കൊമേഴ്സ് വിഭാഗത്തിന്റെ ആഭിമുഖ്യത്തില് കോളേജിലെ മുഴുവന് വിദ്യാര്ത്ഥിനികളെയും സാമൂഹിക സുരക്ഷാ പദ്ധതിയില് അംഗങ്ങളാക്കിയതിന്റെ പോളിസി വിതരണവും കോളേജ് ഡയറക്ടര് സിസ്റ്റര് ഡോ. വിനീതയ്ക്ക് നല്കി അദ്ദേഹം നിര്വ്വഹിച്ചു.
ചടങ്ങില് യൂണിയന് ബാങ്ക് ഡി.ജി.എം. ആര് നല്ലൈയ്യപ്പന്, എസ്.ബി.ഐ. ഡി.ജി.എം. ആര് മുത്തുവേല്, എസ്.ബി.ടി. ഡി.ജി.എം വാസു, സിഡ്ബി ഡി.ജി.എം കെ.വത്സകുമാര്, കോളേജ് ഡയറക്ടര് സിസ്റ്റര് ഡോ. വിനീത, പ്രന്സിപ്പല് ഡോ.സജിമോള് അഗസ്റ്റ്യന്, ലീഡ് ഡിസ്ട്രിക്ട് മാനേജര് വി അനില് കുമാര് എന്നിവര് പ്രസംഗിച്ചു.
