പറവൂര്: പറവൂര് മിനി സിവില് സ്റ്റേഷനില് പ്രവര്ത്തിക്കുന്ന ഐസിഡിഎസ് പറവൂര് പ്രോജക്ട് ഓഫീസില് മോഷണശ്രമം. ഇന്നലെ രാവിലെ ഓഫീസിലെത്തിയ ജീവനക്കാരാണ് വാതിലുകള് തുറന്ന് കിടക്കുന്ന നിലയില് കണ്ടത്. ഓഫീസില് നിന്ന് യാതൊന്നും നഷ്ടപ്പെട്ടിട്ടില്ലായെന്ന് പ്രോജക്ട് ഓഫീസര് പറഞ്ഞു. പതിനാലോളം സര്ക്കാര് ഓഫീസുകളാണ് സിവില് സ്റ്റേഷനില് പ്രവര്ത്തിക്കുന്നത്.
ഐസിഡിഎസ് ഓഫീസിന്റെ തൊട്ടടുത്ത മുറിയിലാണ് കയര് പ്രോജക്ട് ഓഫീസും എംപ്ലോയ്മെന്റ് ഓഫീസും പ്രവര്ത്തിക്കുന്നത്. ഇവ രണ്ടിലും വാച്ച്മാന്മാര് ഉണ്ടെങ്കിലും രാത്രികാലങ്ങളില് ഇവരെ ഇവിടെ കാണാറില്ല. എക്സൈസ് സര്ക്കിള് ഓഫീസും റേയ്ഞ്ച് ഓഫീസും പ്രവര്ത്തിക്കുന്നതും ഈ കെട്ടിടത്തിലാണ്.
വാതിലിന്റെ പൂട്ട് പൊളിച്ചതായി കാണുന്നില്ല. താഴിട്ട് പൂട്ടിയ വാതില് അമര്ത്തി തള്ളിയാല് തുറക്കാന് സാധിക്കും എന്ന വിചിത്രമായ ഉത്തരമാണ് ചില ജീവനക്കാര് പ്രകടിപ്പിച്ചത്. സംഭവം ഉണ്ടായിട്ടും അധികൃതര് പോലീസില് പരാതി നല്കാന് തയ്യാറാകാത്തത് ജനങ്ങളില് സംശയം ഉളവാക്കിയിട്ടുണ്ട്. കുറച്ച് കാലങ്ങളായി പറവൂര് പട്ടണവും പരിസരപ്രദേശങ്ങളും മോഷ്ടാക്കളുടെ വിഹാര കേന്ദ്രമാണ്.
