മത്സ്യസമ്പത്തില്‍ ഗുജറാത്ത് ഒന്നാമത്

കൊച്ചി: മത്സ്യസമ്പത്തിന്റെ കണക്കില്‍ ഗുജറാത്ത് ഒന്നാമത്; 7.12 ലക്ഷം ടണ്‍. രാജ്യത്തെ മൊത്തം മത്സ്യസമ്പത്തിന്റെ 19.8 ശതമാനം വരുമിത്. 2014 ല്‍ ഇന്ത്യന്‍ സമുദ്ര മത്സ്യതീരത്തു നിന്നും ആകെ ലഭിച്ചത് 3.59 ദശലക്ഷം ടണ്‍ സമുദ്ര മത്സ്യസമ്പത്താണ്. 2013 മായി താരതമ്യം ചെയ്യുമ്പോള്‍ ഇത് അഞ്ച് ശതമാനം കുറവാണെന്ന് കേന്ദ്രമത്സ്യ ഗവേഷണ സ്ഥാപനം ഡയറക്ടര്‍ ഡോ.എ. ഗോപാലകൃഷ്ണന്‍ പറഞ്ഞു.

ഗുജറാത്ത്, തമിഴ്‌നാട്, കേരളം, മഹാരാഷ്‌ട്ര, പശ്ചിമ ബംഗാള്‍, ദാമന്‍ ദിയു എന്നീ സംസ്ഥാനങ്ങളില്‍ മത്സ്യ സമ്പത്തിന്റെ ലഭ്യതയില്‍ കുറവും കര്‍ണാടക, ആന്ധ്ര, ഗോവ, ഒഡീഷ എന്നിവിടങ്ങളില്‍ വര്‍ധനവും രേഖപ്പെടുത്തിയിട്ടുണ്ട്.

തമിഴ്‌നാട് 6.65 (18.5%), കേരളം 5.76 (16%), കര്‍ണാടക 4.74 (13.2%), മഹാരാഷ്‌ട്ര 3.44 (9.6%), ആന്ധ്ര 3.42 (9.5%), ഗോവ 1.53 (4.3%), ഒഡീഷ 1.39 (3.9%), പശ്ചിമ ബംഗാള്‍ 0.77 (2.1%), പുതുച്ചേരി 0.65 (1.85%), ദാമന്‍ ദിയു 0.46 (1.3%) ലക്ഷം ടണ്‍ എന്നിങ്ങനെയാണ് 2014ല്‍ ലഭിച്ച മത്സ്യ സമ്പത്ത്.

മത്തി (5.45), അയല (2.37), വറ്റ (2.10), പാമ്പാട (2.09), ചെമ്മീന്‍ (2.06), ഇതര മത്തി വര്‍ഗങ്ങള്‍ (2.06), ഇതര ചെമ്മീന്‍ വര്‍ഗങ്ങള്‍ (1.83), കൂന്തല്‍ (1.73), കോര (1.62) എന്നിവയാണ് മത്സ്യലഭ്യതയില്‍ പ്രധാന പങ്കു വഹിയ്‌ക്കുന്ന ഇനങ്ങള്‍. ഇതില്‍ ഇതര മത്തി വര്‍ഗങ്ങള്‍, അയല, ചെമ്മീന്‍ എന്നിവ മത്സ്യലഭ്യതയില്‍ വര്‍ധനവ് രേഖപ്പെടുത്തിയപ്പോള്‍ മത്തി, പാമ്പാട, വറ്റ, ഇതര ചെമ്മീന്‍ വര്‍ഗങ്ങള്‍, കൂന്തല്‍, കോര എന്നിവയുടെ ലഭ്യതയില്‍ കുറവ് രേഖപ്പെടുത്തി.

ആദ്യമായി ഈ വര്‍ഷം എല്ലാ തീരദേശ സംസ്ഥാനങ്ങളിലും മത്തി ലഭിച്ചിട്ടുണ്ട്. എന്നാല്‍ പശ്ചിമ ബംഗാളില്‍ പ്രധാന ഇനമായ ഹില്‍സയുടെ ലഭ്യത 5000 ടണ്ണായി കുറഞ്ഞു. ലാന്‍ഡിങ് സെന്ററില്‍ ലഭിക്കുന്ന വിലയനുസരിച്ച് സമുദ്ര മത്സ്യ ലഭ്യതയുടെ മൂല്യം കണക്കാക്കുകയാണെങ്കില്‍ 2013നെ അപേക്ഷിച്ച് 8.1% വര്‍ധനവും ആകെമൂല്യം 31,754 കോടി രൂപയുമാണ്. ചില്ലറ വില്‍പ്പന മേഖലയില്‍ മൂല്യത്തില്‍ 12.1% വര്‍ധനയും ആകെ മൂല്യം 52,363 കോടിരൂപയുമാണ്.

കേരളത്തില്‍ ലാന്‍ഡിങ് സെന്ററില്‍ 18.3 ശതമാനവും ചില്ലറ വില്‍പ്പനയില്‍ 19.14 ശതമാനവും വര്‍ധനവ് രേഖപ്പെടുത്തിയിട്ടുണ്ട്. കേരളത്തില്‍ മത്തിയുടെ ലഭ്യത കുറഞ്ഞതിന്റെ പ്രധാന കാരണം കാലാവസ്ഥാ വ്യതിയാനവും കടല്‍ച്ചൊറിയുടെ അമിത വര്‍ധനവുമാണെന്നും അദ്ദേഹം ചൂണ്ടിക്കാട്ടി.