കോട്ടയം: മഹാത്മാ ഗാന്ധി സര്വ്വകലാശാലയുടെ കീഴിലുള്ള സ്ഥാപനങ്ങളില് പഠിക്കുന്ന വിദ്യാര്ത്ഥികള്ക്കെല്ലാം അടുത്ത് അക്കാദമിക വര്ഷം മുതല് രാജ്യത്തെ പ്രമുഖ അക്കാദമിക പ്രസാധകരുടെ ഇ-ബുക്കുകള് ഓണ്ലൈന് ആയി ലഭ്യമാക്കുന്നതിനുള്ള നടപടികള് ആരംഭിച്ചതായി വൈസ് ചാന്സലര് ഡോ.ബാബു സെബാസ്റ്റിയന് പറഞ്ഞു. സര്വ്വകലാശാല ലൈബ്രറിയുടെയും കേരള ലൈബ്രറി അസോസിയേഷന്റെയും ആഭിമുഖ്യത്തില് ഓപ്പണ് ഓണ്ലൈന് സോഫ്റ്റ് വെയറായ വേര്ഡ് പ്രസിനെ സംബന്ധിക്കുന്ന പരിശീലന ശില്പശാല ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം.
ലോകപ്രശസ്ത കമ്പനിയായ ഇന്റലിന്റെ സാങ്കേതിക സഹായത്തോടെ കെല്ട്രോണിന്റെും സി-ഡിറ്റിന്റെയും സഹകരണത്തോടെ നടപ്പിലാക്കുന്ന സമ്പൂര്ണ്ണ ഇ-ലേണിങ് പദ്ധതി സര്വ്വകലാശാലയുടെ കീഴിലുള്ള 300 ല് അധികം സ്ഥാപനങ്ങളിലെ 7000 അദ്ധ്യാപകര്ക്കും 3.5 ലക്ഷം വിദ്യാര്ത്ഥികള്ക്കും പ്രയോജനം ചെയ്യും. അത്യാധുനിക കണ്ടന്റ്മാനേജ്മെന്റ് സിസ്റ്റത്തില് വികസിപ്പിക്കുന്ന പഠനസാമഗ്രികളില് വെര്ച്യുല് ലാബ്, സിമുലേഷന് സങ്കേതങ്ങളും സമന്വയിപ്പിക്കുന്നുണ്ട്. സര്വ്വകലാശാല ലൈബ്രറിയുമായി ബന്ധപ്പെടുത്തുവാന് ഡെഡികേറ്റഡ് നെറ്റുവര്ക്കുകള് ഉണ്ടായിരിക്കും. സര്വ്വകലാശാലയുടെ സേവനങ്ങള് ആവശ്യക്കാരിലേക്ക് നേരിട്ട്് എത്തിക്കാന് എല്ലാ സ്ഥാപനങ്ങളിലും പ്രത്യേക സെര്വ്വറുകളും കീയോസ്കുകളും സ്ഥാപിക്കും. പരിധിയില്ലാത്ത കണക്റ്റിവിറ്റി തടസമില്ലാതെ ഉറപ്പാക്കാന് നടപടി സ്വീകരിക്കുമെന്നും ഡോ.ബാബു സെബാസ്റ്റിയന് പറഞ്ഞു.
സര്വ്വകലാശാല ലൈബ്രേറിയന് ലൈല.റ്റി.ഏബ്രഹാം അദ്ധ്യക്ഷത വഹിച്ച യോഗത്തില് ഡോ.കെ.ഇന്ദുലേഖ, പി.ആര്.ഒ ജി.ശ്രീകുമാര്, കേരള ലൈബ്രറി അസോസിയേഷന് സെക്രട്ടറി വി.വിമല്കുമാര്, കോളജ് ലൈബ്രററി അസോസിയേഷന് സെക്രട്ടറി കെ.മുരളീധരന് എന്നവര് സംസാരിച്ചു.
