കുരുക്കഴിക്കാതെ മാന്‍.യു

ലണ്ടന്‍: ഇംഗ്ലീഷ് പ്രീമിയര്‍ ലീഗില്‍ സമനിലയുടെ കുരുക്കഴിക്കാന്‍ മുന്‍ ചാമ്പ്യന്‍മാരായ മാഞ്ചസ്റ്റര്‍ യുണൈറ്റഡിന് സാധിക്കുന്നില്ല. ഇത്തവണയവര്‍ സ്റ്റോക്ക് സിറ്റിയോട് 1-1ന് സന്ധി ചെയ്തു. നാലു മത്സരത്തിനിടെ ഇതു മൂന്നാം വട്ടമാണ് ചുവന്ന ചെകുത്താന്‍മാര്‍ക്ക് പോയിന്റ് പങ്കിടേണ്ടിവരുന്നത്. ഒരുഘട്ടത്തില്‍ കിരീടപ്പോരാട്ടത്തില്‍ സജീവമാകുമെന്നു കരുതപ്പെട്ട മാഞ്ചസ്റ്റര്‍ പ്രതിനിധികള്‍ ഇതോടെ വളരെ പിന്തള്ളപ്പെട്ടു. 20 മത്സരങ്ങളില്‍ നിന്ന് 37 പോയിന്റുള്ള ലൂയിസ് വാന്‍ ഗാലിന്റെ കുട്ടികള്‍ മൂന്നാംസ്ഥാനത്താണ്.

കനത്ത കാറ്റ് പശ്ചാത്തലമൊരുക്കിയ സ്വന്തം തട്ടകത്തിലെ അങ്കത്തില്‍ സ്‌റ്റോക്കാണ് ശുഭാരംഭം കുറിച്ചത്. രണ്ടാം മിനിറ്റില്‍ റ്യാന്‍ ഷാക്രോസിന്റെ സ്‌ട്രൈക്കില്‍ അവര്‍ മാന്‍.യുവിനെ കുത്തിനോവിച്ചു.

മാര്‍ക്കോ അര്‍ണാടോവിച്ചിന്റെ കോര്‍ണര്‍ പീറ്റര്‍ ക്രൗച്ച് ഷാക്രോസിന് ഹെഡ്ഡ് ചെയ്തു നല്‍കി. ഷാക്രോസിന്റെ വോളി ലക്ഷ്യത്തിലെത്തി (1-0).

അവിടെ നിന്ന് മാന്‍.യു തിരിച്ചടിക്ക് കോപ്പുകൂട്ടി. 26-ാം മിനിറ്റില്‍ സെറ്റ്പീസിലൂടെ തന്നെ മാഞ്ചസ്റ്റര്‍ പട സമനില കണ്ടെത്തി. വെയ്ന്‍ റൂണിയുടെ കോര്‍ണര്‍ മൈക്കല്‍ കാരിക്ക് ഫ്‌ളിക്ക് ചെയ്തു. പന്തുപിടിച്ച ഫല്‍ക്കാവോ മാന്‍.യുവിന്റെ കുപ്പായത്തില്‍ മൂന്നാം ഗോളിന് പിറവികൊടുക്കാന്‍ അമാന്തിച്ചില്ല (1-1). പിന്നെ ഗോളൊന്നും വന്നില്ല.

രണ്ടാം പകുതിയില്‍ ക്രൗച്ചിന്റെ ഷോട്ടിന് പോസ്റ്റ് വിഘാതം സൃഷ്ടിച്ചതും പെനാല്‍റ്റി നിഷേധിക്കപ്പെട്ടതുമൊക്കെ സ്റ്റോക്കിന്റെ പ്രതീക്ഷകളെ തകര്‍ത്തു.