കോട്ടയം: കോട്ടയം കുമളി ദേശീയപാതയില് വടവാതൂര് ജങ്ഷനില് ശുദ്ധജല വിതരണത്തിനുള്ള പ്രധാന പൈപ്പ് പൊട്ടിയതിനെത്തുടര്ന്ന് റോഡു തകര്ന്നു, കുടിവെള്ള വിതരണം മുടങ്ങി. ഇന്നലെ രാവിലെ ഒന്പതുമണിയോടെയാണ് വടവാതൂര് ജങ്ഷനില് പൈപ്പു പൊട്ടി വന് വെള്ളക്കെട്ട് രൂപപ്പെട്ടത്. വടവാതൂര് ഇഎസ്ഐ ആശുപത്രിക്കു സമീപമുള്ള വാട്ടര് ടാങ്കിലേക്ക് വെള്ളമെത്തിക്കുന്ന പൈപ്പ്ലൈനാണ് തകര്ന്നത്. പൈപ്പുപൊട്ടി വെള്ളം കുത്തിലൊലിച്ചതോടെ റോഡില് വന്ഗര്ത്തം രൂപപ്പെട്ടു. റോഡിന്റെ അടിഭാഗത്തുനിന്നും മണ്ണ് കുത്തിയൊലിച്ചു പോയതിനാല് ഏതുസമയവും റോഡ് ഇടിഞ്ഞു താഴാവുന്ന സ്ഥിതിയിലാണ്. റോഡിന്റെ ഉപരിതലം മാത്രമാണ് നിലനില്ക്കുന്നത്. ഭാരവാഹനങ്ങള് ഇതുവഴി കടന്നുപോയാല് റോഡ് ഇടിഞ്ഞ് വന് അപകടം ഉണ്ടാകാന് സാദ്ധ്യതയുണ്ട്.
കോട്ടയം കളക്ട്രേറ്റ് ഭാഗം, പനച്ചിക്കാട്, വടവാതൂര്, മണര്കാട് പ്രദേശങ്ങളിലെ കുടിവെള്ള വിതരണം തടസ്സപ്പെട്ടു. വടവാതൂര് ജങ്ഷനിലെ പൈപ്പിലെ ടി ആകൃതിയിലുള്ള ഭാഗത്താണ് തകരാറുണ്ടായത്. നേരത്തെയും ഈ ഭാഗത്ത് ശുദ്ധജല വിതരണ പൈപ്പി ല് തകരാറുകള് ഉണ്ടായിട്ടുണ്ടെങ്കിലും ഇത്രവലിയ തോതില് നാശനഷ്ടങ്ങള് ഉണ്ടാകുന്നത് ആദ്യമായാണെന്ന് നാട്ടുകാര് പറയുന്നു. രാവിലെ പൈപ്പ് പൊട്ടിയതിനെത്തുടര്ന്ന് റോഡില് വെള്ളക്കെട്ടും ഗതാഗതതടസ്സവും ഉണ്ടായതിനു പുറമെ സമീപത്തെ കടകളിലെല്ലാം വെള്ളം കയറി. ശുദ്ധജല വിതരണക്കുഴലിന്റെ അറ്റകുറ്റപ്പണികള് പൂര്ത്തിയായാലും റോഡുഗതാഗതം സുഗമമാകാന് സമയമെടുക്കും. ഏറെ ഗതാഗതത്തിരക്കുള്ള ദേശീയപാതയിലെ അഗാധഗര്ത്തം വാഹനങ്ങള്ക്ക് ഭീഷണിയാണ്. വാട്ടര് അതോറിട്ടി ജീവനക്കാരെത്തി പൈപ്പ് നന്നാക്കുന്നതിനുള്ള ശ്രമങ്ങള് ആരംഭിച്ചു.
