ചങ്ങനാശേരി: മാടപ്പളളി എന്ഇഎസ് ബ്ലോക്കിനു സമീപം ഒറ്റയ്ക്കു താമസിക്കുന്ന വീട്ടമ്മയില്നിന്നും കേരളാ കോണ്ഗ്രസ് പ്രാദേശിക നേതാവ് ലക്ഷങ്ങള് തട്ടിയെടുത്തതായി പരാതി പണം തിരികെ കിട്ടാന് തട്ടപ്പിനിരയായ വീട്ടമ്മ സത്യഗ്രഹം ആരംഭിച്ചു. അമ്പലവേലില് വീട്ടില് മറിയാമ്മ ജോണ് (80) ആണ് തട്ടിപ്പിനിരയായത്. മാടപ്പള്ളി ഇടപ്പള്ളി കോളനിയില് ഇളപ്പുങ്കല് വീട്ടില് രാജമ്മയുടെ വസതിക്കു മുന്നിലാണ് മറിയാമ്മ ജോണ് സത്യഗ്രഹം ആരംഭിച്ചിരിക്കുന്നത്.
രാജമ്മയുടെ ഭര്ത്താവ് സോമന് വര്ഷങ്ങളായി മറിയാമ്മയുടെ വീട്ടിലെ റബ്ബര് ടാപ്പിംഗ് തൊഴിലാളിയായിരുന്നു. ഈ സമയത്ത് പത്തനംതിട്ടയിലുള്ള മതസ്ഥാപനത്തിന്റെ പേരില് അനാഥാലയം നടത്തുന്നതിനുവേണ്ടി മറിയാമ്മയുടെ പേരിലുള്ള പന്ത്രണ്ടേക്കര് സ്ഥലം സ്ഥാപനത്തിന്റെ ചുമതലക്കാര് കൈവശപ്പെടുത്തിയിരുന്നു. ഈ സ്ഥലം തിരികെ ലഭിക്കുന്നതിനുവേണ്ടി കേസ് നടത്തുന്നതിനായി ആദ്യഘട്ടം ആറരലക്ഷം രൂപ കേരളാ കോണ്ഗ്രസ് പ്രാദേശിക നേതാവായിരുന്ന സുരേഷിനെ ഏല്പിക്കണമെന്ന് പറഞ്ഞ് മറിയാമ്മ രാജമ്മയെ ഏല്പിച്ചു. പണം വക്കീലിനു നല്കാനായി സുരേഷിനെ എല്പ്പിച്ചെന്ന് രാജമ്മ പറയുന്നു. പിന്നീട് രണ്ടുതവണയായി നാലര ലക്ഷവും പത്തുലക്ഷവും രൂപയും നല്കി.
കഴിഞ്ഞവര്ഷം ഡിസംബര് മൂന്നിനാണ് അവസാനമായി പണം കൈമാറിയത്. കേസ് നടത്തുന്നതിനുവേണ്ടി അഡ്വ. ആന്റണി വര്ഗീസ് മറിയാമ്മയെ സമീപിക്കുമ്പോഴാണ് പണം വക്കീലിന് ലഭിച്ചില്ലെന്ന് അറിയുന്നത്. ഇതിനെത്തുടര്ന്ന് മറിയാമ്മ രാജമ്മയോടും സുരേഷിനോടും നിരന്തരമായി അന്വേഷിക്കുകയും പണം ആവശ്യപ്പെടുകയും ചെയ്തു. എന്നാല് പണം വക്കീലിനെ ഏല്പ്പിച്ചെന്നു പറഞ്ഞ് ഇരുവരും ഒഴിഞ്ഞുമാറുകയായിരുന്നു. തുടര്ന്ന് പണം തിരികെ കിട്ടാത്തതിനാല് രാജമ്മയുടെ വീടിനു മുന്നില് മറിയാമ്മ ഇന്നലെ രാവിലെ മുതല് സത്യഗ്രഹം ആരംഭിക്കുകയായിരുന്നു.
ലക്ഷക്കണക്കിനു രൂപയുടെ ആസ്തിയുണ്ടായിരുന്ന മറിയായമ്മയെ മുമ്പ് കൊലപ്പെടുത്താന് ശ്രമിച്ച സംഭവവുമായി ബന്ധപ്പെട്ട് തൃക്കൊടിത്താനം സ്റ്റേഷനില് കേസ് നിലവിലുണ്ട്.
